Vroenhove

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Vroenhoves, es te dit dialek sjpriks.

---

Vroenhove is e dörp in de Belsj-Limbörgse gemeinte Riems, aon de grens mèt Nederland bij Mestreech. 't Dörp had in 2005 1.125 inwoeners.

Neoromaanse Pieters- en Paulskèrk in Vroenhove.

Aw brögk euver 't kenaal, begin 2009 opgebloze.

Aonziech

Vroenhove weurt in twie gesnooje door 't Albertkenaal. D'n eigeleken dörpskern ligk aon de weskant, meh aon d'n ooskant, langs de Mestreechtersteinweeg, strek ziech ouch bebouwing oet. De weskant besteit evegood veur e groet deil oet lintbebouwing, meh heet wel 'n dörpskómp. 't Belaankriekste monumint is de neoromaanse Pieters- en Paulskèrk (zuug foto).

Dörpsfuncties

't Klein dörp veurzuut, wie aander grensplaotse, in 'n woenbehoofde vaan Mestreechter studente, veural ierstejaors die in de stad nog gein kamer kinne vinde. Vreuger veurvölde 't ouch 'n oetgaonsfunctie: in de gemeinte golle gein sletingstije, wat in Mestreech wel zoe waor. Nao zien de mieste kaffees bij de grens weg.

Historie

Vroenhove stoont tot in de negentienden iew bekind es Moontenake. In 1839 woort de gemeinte gesplits: 't gebeed um Mestreech mós 'n bufferzaone veur Nederland weure. Zoe kaome de gehuchte Nekum, Kaberg en Wolder in de Nederlandse gemeinte Aajd-Vroenhove te ligke; Vroenhove zelf woort Belsj. In d'n Twiede Wereldoorlog is hel gevochte bij de brögk. 't Belsj leger perbeerde die op 10 mei 1940 op te bloze um de Pruse de pas aof te snije; dit mislökde en tien soldaote kaome um. Denao perbeerde ouch vlegers de brögk vergeefs kepot te sjete. In 1977 woort de gemeinte Vroenhove opgeheve en bij Riems geveug. Hubert Marres waor mèt 50 jaor (1908-1958) de langs zittende börgemeister vaan de gemeinte. In 2010 woort 't verkiersknelpunt bij Vroenhove opgelos door de bouw vaan 'n nui brögk.