Zieversbaek

Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Völzer, es te dit dialek sjpriks.

---

De Zieversbaek is ein baek in Nederlandjs Zuud-Limburg en is ein ziebaek van de Gäöl. De baek óntsjprink biej Wolfhaag en kump ten noord-weste van Vaols biej Lemiers in de Selzerbaek oet. 't Eësjte gedeilte van de baek is euverkloes. De baek wirt gevoed door allerlei klein brónne en ziejbaeke, wovan de Winnebrokermeulebaek en de Wijerhaofbaek de belangriekste zint. De baek ligk in 't landjsjap in eine kómp dae ómsjlaote wirt door Holset, de Vielenerbosje en de Vaolserberg en meandert vriejoet door heuvelechtig weijegebeed en haet zoa ein natuurlik prefiel.

De Zieversbaek biej de Sjuurmeule

De totale lengde van de baek is 3 km, de gemiddelde breide 1,5-2,5 maeter en de deepde 0,1 pes 0,15 maeter. De sjtoumingssjnelheid ligk tösje 0,4 pes 0,8 m/sec.

De watermeules

Op de Zieversbaek ligke drie watermeules, sjtroumaafwaerts gezeen zint dat:

• De Vaolsbrokermeule biej kesjteël Vaolsbrook, die gevoed wirt door water oet eine vergaarviever dae op zien beurt gevoed wirt door ein groat aantal brónne op 't landjgood van ’t kesjteël die deil oetmake van de Zieversbaek.
• De Frankenhaofmeule in 't buurtsjap Weijerplei, ouch waal Weijershaofmeule geneump, gelaege tösje Holset en Vaols. Dees meule, die neet meë in gebruuk is, woort gevoed oet tweë sjtuwvieversj wovan de watersjtand geregeld woort door ein sjluuske in de Zieversbaek.
• De Sjuurmeule aan de Oude Akerwaeg.

• 
  De Zieversbaek nao de Sjuurmeule
• 
  't Sjluuske baove de Frankenhaofmeul
• 
  Ein van de sjtuwvievers biej de Frankenhaofmeule