Mechele (Nederlands Limburg)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Mechele ies 'n dörp in 't heuvelland van Zuud-Limburg in de gemeinte Gulpe-Wittem.

Buurtsjappe van Mechele zint: Bisse, Bommerig, Broek, Dal, Elzet, Helle, Hilleshage, Häöfke, Hurpesj, Kleeberg,Kosberg en Sjweberig.

Bie't punt woa de Mechelbeek in de Geul sjtruimp ies Mechele óntsjtange es nederzètting rónd 'n landgood van grave van Limburg. In 2005 haet Mechele, same mèt de buurte, óngevaer 2000 inweunersj.

De kèrk ies gewiejd aan Sint Jan d'n Duiper oet 1810. 't óntwerp ies van architect Mathias Soiron oet Mesjtreech. In de tore, oet 1837, zint neo-romaanse elemente toepgepas. In later jaore woort 't sjeep verlengd en in 1935 kreeg de kèrk 't haufrón koardeil. In 't interieur ies gebruuk gemaak van antieke veurwerpe. Veurbeelde zin: 'n barok altaor, 'n 16e ièws beeld van Sint Jan en 'ne rococo praeksjtool oet de 18e ièw.

'n Paar markante geboewe zint:

• De Herenhof, 'n sjtatig vakwerkhoes, sjtamp oet de 12 ièw. 't Waor bezit van de grave van Limburg. 't Hudige geboew dateert oet 1825.
• In 't Panhoes waor oats 'n broewerie gevestig.
• 'n Watermeule op de Mechel.
• Vakwerkhaof de Plei. In en rónd 't dörp bevinge ziech nog väöl ouw vakwerkhoezer.