Ella Fitzgerald: Versjèl tösje versies

Ella Fitzgerald haaj 'n meujelike en erme jeug. Zie woor 't jaor väor häor grote doorbraok zelfs dakloos. Zie waerde aevel ontdek bie 'ne amateurwedsjtried in 't naojaor van 1934 in Harlem, New York. Vervolgens noom Chick Webb häor in zien orkes op en zo vergaarde Fitzgerald häor roem. Mit Webb noom zie vanaaf 1935 väor Decca plate op, wovan häor bewirking van 't kinjerleedje 'A-Tisket, A-Tasket' een hit oplaeverde. Wie Webb in 1939 sjtorf waerde 't orkes omgeduip toet Ella Fitzgerald and her Famous Orchestra, mit maotig succes.

 

 

In 1941 besjloot de zengeres, die vrie jong en onervare woor väor 't leije van 'ne aojerwitse bigband dae langzaam oet de mode begos te rake, solo wiejer te gaon. Zie koos häor repertoire ummer minder oet swing en meer oet bebop, 't letste veural doordet zie toerde mit de bereumde bebopper Dizzy Gillespie en de bekinde bandleijer Duke Ellington.