Vievere
Dit artikel is gesjreve (of begós) in 't Toears. Laes hie wie v'r mit de versjillende saorte Limburgs ómgaon.
Vievere of Vijvere is de naam van e mythisch verzónke stedje det oeajt tösse Kaesing en Thoear mót höbbe gelaege. Uuever de exakte locatie zin de meininge verdeildj, mer 't netuurgebied 't Vieverbrook aan de Itterbaek wuuertj 't meiste geneumdj. Anger luuj verbinje 't juus wieër aan de hujige grindjplasse (de Groeate Hègke en de Munsterse Speie) aan de Maas. Dees wiejers zin aevel pas in d'n twintjigsten ieëw gegrave gewoeare; de mythe besteit al vuuel langer.
Volges 't volksgeluif waas Vievere 'n groeate, welvarendje stad. Es e gevolg van dees riekdóm leidje de luuj e goddeloeas laeve, woeabie zie einanger bestole en bedroge, hieël ingebieëldj wore en continu vlookdje. Oeteindjelik troch d'n duvel Vievere mit de hel in.
Vievere verdween aevel neet gans. De inweuners van de strieëk huuerdje döks, vuueral snachs, de vruueger luuj van Vievere nag lammentere. Ouch kós me de klokke vanne kirk nag huuere. Sommige luuj vertalle zelfs verhoeale uuever de kirktoeare mit gouwjen haan, dae me nag oet 't moeras kós zeen staeke. 'n Anger verhoeal zaet det me de kirkklok oeajt haet gevónje, mer det dees is gestoeale.
Archeologisch bewies vuuer de stad guuef 't neet; allein haet me op de törfstaekplaatse hoofiezers gevónje, die d'rop wieze det dao oeajt paerd höbbe geloupe.