Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Touverkóns, touvenerie of mazjie is 't gebroek van rituele, symbole, hanjelinge, gebaren en spraok (spreuke) veur zoea get te haolen oet baovenetuurlike machte. Hiemit zów me de wirkelikheid kónne manipulere. 't Geluiven in en beübe van touverkóns besteit al saere prehistorie en speeltj in väöl kulture nag ummer 'n wichtige spirituele, godsdeenstige en genaeskóndige rol.

't Gelouf det 'ne miens baovenetuurlike machte kan beïnvleuje door te baeje, offeren of door aanroping kan me trögkvinjen in archeologische vónjste van oete prehistorie, mer ouch in aaj tekste, wie die van 't aad Egypte enne Indische Veda. 't Sjamanisme worin kóntak mit 't geisteriek centraal steit liek universeel te zeen gewaes bieje jaeger-verzamelieërs. 't Kump nag ummer veur bieje inheimsje völker van Australië en Nuuj-Zieëlandj toet in Afrika, 't Amazonegebied, Naord-Amerika en zelfs bieje Samen in Europa.

Wen touverkóns wuuert beüub in 't geheim, wie occultisme, guuef 't döks väöl scepticisme en aafkieër daotaenge. Allewiel zeen väöl luuj die de touverkóns aanhange 't es get veure persuuenlike spirituele greuj. Ieëre geluifdje väöl luuj det de touverkóns 'n oetkóms kós beje bie zake wie ónvröchbaarheid, gezóndjheidsperbleme, veiligheid en 't leefdjeslaeve. 't Geluiven in touverkóns waas ouch ein vanne driefvare veure jach taenge de hekserie.

Touverkóns wuuert owwel gebroek veur 't goochele, 't illusionisme en 't mentalisme aan te duje, meh hiebie waere gein baovenetuurlike machte aangerope. Begrippe die mieë samehange mit touverkóns zeen waorzègkerie en biegelouf.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Touverkóns&oldid=439918"