Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Buuls, es te dit dialek sjpriks.

Schoeët, voloet geneump Buul-Schoeët (Nederlands Budel-Schoot) is 'ne woenkern in de gemeinte Kraonendónk. In 2007 had 't 2180 inwoeners. Vaan oersprunk waor Schoeët mer 'n naobersjap vaan 't dörp Buul; sinds de negentienden iew is 't tot 'n ech dörp oetgegreujd.

Ligking bewirk

Schoeët ligk oongeveer 'ne kilometer zuidzuidwestelek vaan Buul(-centrum) en e paar hoonderd meter oostelek vaan de Belzje grens bij Haëmet. Euver d'n hoofweeg geit 't naodloes euver in (Buul-)Dorplein; 't midde vaan die plaots ligk zoe'n twie kilometer bij 't midde vaan Schoeët vaandan. Get excentrisch (noordoostelek) ligk Klein-Schoeët, wat zien aajd lendelek karakter mie heet behawwe (zuug ouch direk oonder).

Historie bewirk

De naom Schoeët liet ziech verklaore es 'zuim vaan de akkers aon de kant vaan de hei': dit gebeed vörmde de zuidgrens vaan 't Buuls bouwland. Iewelaank bestoont Schoeët oet twie naobersjappe: Groeët-Schoeët en Klein-Schoeët. In de negentienden iew kaom dynamiek in 't gebeed, wie me in 1829 de Zuid-Willemsvaort laanks Schoeët aonlag. Dit zörgde nog neet veur greuj: in 1880 gaof 't hei nog mer 27 inwoeners. D'n echten impuls kaom mèt d'n aonlag vaan d'n Iezere Rijn door Schoeët in 1879. De nui statie Buul kaom noe in Groeët-Schoeët, wat al gaw begós te greuje en väöl horeca en middestand verzaomelde. De statie bleef ope tot 1953. Wijere greuj kaom mèt de eupening vaan 't zinkfebrik in 1893, allewel tot de eigenere ouch hun eige arbeiersdörp bouwde (Dorplein). Mèt de stiechting vaan 'n sjaol in 1906 en 'n kèrk in 1908, en de opriechting vaan 'n eige parochie in 1917, woort Schoeët 'n ech dörp.

Beziensweerdeghede bewirk

In 't dörp steit de Slevrouw-Visitatie en Sint-Antoniuskèrk oet 1930, e laat veurbeeld vaan neogotiek. Ze vervingk 'n awwer kèrk oet 1908. Sinds 1937 steit de koremeule Janzona in 't dörp; dit is 'n meule oet 1802 die teveure in Venlo heet gestande.

Ouch de umgeving is beziensweerdeg. Oostelek vaan Schoeët vint me de Wieërter- en Buulderberg.

Bron bewirk

Dit artikel is gebaseerd op, meh neet vertaold oet, ziene Nederlandstaolege tegehenger, en wel in dees versie.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Schoeët&oldid=351213"