San Marinees hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't San Marino Stadium in Serravalle, boe 't nationaol team zien toesmatche späölt.

't San Marinees hierevoetbalèlftal vertreujt San Marino in internationaol voetbalmatche. 't Team weurt gereguleerd door de nationaol fidderatie FSGC, die sinds 1988 bij de UEFA en de FIFA is aongeslote. Sindsdeen heet 't team extreem wieneg succes gehad en dèks mèt groete ciefers verlore. De prestaties zien zelfs nog minder es die vaan aander dwergstaote in Europa; dit maak 't Sanmarinees team eint vaan de slechste nationaol èlftalle op de wereld. Per 16 augustus steit 't team 203e op de FIFA-Wereldraanklies, op e totaol vaan 211.[1]

San Marino späölt zien toesmatche in 't San Marino Stadium in Serravalle.

Historie bewirk

De San Marinese voetbalboond stamp oet 1931, meh pas jaore later woort serjeus werk gemaak vaan e nationaol èlftal. In 1986 woort veur 't iers 'n èlftal opgestèld, wat op 28 miert vaan dat jaor aontrooj tege 't Canadees Olympisch èlftal (0-1 verlees). In 1988 kaom de boond bij de FIFA en de UEFA en kóste de matche vaan 't team ouch officieel weure erkind.

Sindsdeen heet San Marino ziech veur alle groete toernoje ingesjreve. Noets kaom 't team in de buurt vaan kwalificatie, en miestens indegde 't team puntloes oonderaon. Groete teams hole soms hendeg oet tege San Marino: zoe won Duitsland in 2006 mèt 0-13 en zat Nederland in 2011 'nen indstand vaan 11-0 neer. Wienie e groeter team neet of neet gemekelek vaan San Marino wint, kin dat zwoer gevolge höbbe veur de favoriete. Zoe stapde Gary Johnson, coach vaan Letland, in 2001 op naotot zie team mèt 1-1 geliek had gespäöld tege San Marino. De insegste euverwinning die 't èlftal oets haolde waor op 28 aprèl 2004, in 'ne vrundsjappeleke match tege Liechtenstein (1-0).

Recordinternational is Andy Selva, dee tösse 1998 en 2016 74 kier veur San Marino oetkaom. Mèt 8 gole is heer ouch topscoorder.

Rifferenties bewirk

  1. FIFA-Wereldraanklies (manslui), bezien op 11 september 2018