Romeinse catacombe (Valkeberg)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De Romeinse catacombe van Valkeberg zin 'n kopie van de catacombe in Roame (Italië). Ze liegke in De Plenkert in Valkeberg en zint dao in 1913 oetgehouwe in de mergelberg of grotte. De ouwe ingank, 'n mergele gebuuwke in klassieke sjtiel mèt tympaan, bevingk ziech in de bosj tegeneuver de veurmalige Leeuw-beerbroewerie. In 2010 woorte de Catacombe 'n officieel erkènd museum.

Historie in Roame

In Roame waore de catacombe, oarsjprónkelik 61 sjtök, óndergróndse begraafplaatse. De individueel graver woorte in verdepinge bovenein oetgehouwe en nao de biezètting mèt sjteine of marmere plate aafgesjlote. De graver van de rieke luuj woorte mèt moersjilderinge verseerd. 't Hoagtepunt van dees meneer van begrave veel in de veerde-viefde ièw, same mèt de doorbraak van 't Christendóm es Romeinse sjtaatsgodsdeens. De catacombe krege daodoor 'n Christelik sjtempel.

Gesjiedenis in Valkeberg

In 1908 kreeg Jan Diepen in Valkeberg, nao 't leze van 'n beukske euver dees catacombe, 't idee um in de mergelgrotte op zien terrein dees catacombe te laote naoboewe. Architect Pierre Cuypers, dae toendertied in Valkeberg väöl geboewe óntworpe hou, woort ouch gevraog veur dit projek. Vanaaf 1909 reisde Diepen 'n paar kièr nao Roame um te bepale welke deile in Valkeberg naogemaak zouwe were. De paus, Pius X, dae dit werk sjtimuleerde, beneumde häöm tot Commandeur in de orde van Gregorius. Oeteindelik zouwe veertièn versjillende catacombe in Valkeberg naogemaak were. In 1913 waore ze vaerdig.