Pools hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


E stel fiesverende Poolse voetballers nao hun wins tege Brazilië op 't WK vaan 1974.

't Pools hierevoebalèlftal (bijnaom Białe Orły 'de Witte Adelere') späölt voetbalinterlands veur Pole. 't Team weurt gereguleerd door de Poolse voetbalboond PZPN. 't Team heet door de jaore heer wisselend gepresteerd; ziene glorietied laog in de jaore 1970.

Historie bewirk

Veur d'n Ierste Wereldoorlog gaof 't gein oonaofhenkelek Pole; Congres-Pole woort es deil vaan Rusland gezien en had daorum gein eige èlftal. Mèt 't oontstoon vaan 'ne Poolse staot kós ouch e Pools èlftal weure geformeerd; dit späölde in 1921 zienen ierste match, tege Hongarije (1-0 verluus). Pole woort veerde op de Olympische Speule in Berlijn vaan 1936, en deeg twie jaor later veur 't iers mèt aon e WK (in Fraankriek), boe nao e spectaculair duel mer zjus (5-6) vaan Brazilië woort verlore. Mèt de Duits-Sovjet-Russischen inval vaan 1939 kaom 't Pools èlftal aon zien ind.

In 1946 woort e nui èlftal opgestèld, wat begós tege Noorwege (3-1 verluus). In dees jaore waor 't Pools èlftal nog neet bezunder succesvol. In 1963 bookden 't wel 'n klinkende euverwinning (9-0) op de Nore, 'nen oetslaag dee Pole pas in 2009 (10-0 tege San Marino) zouw euvertreffe. 't Kaom pas ech op gaank wie in 1970 coach Kazimierz Górski woort aongestèld. Heer wis mèt Pole 'n gouwe medajel te hole op de Olympische Speule in München vaan 1972. Belaankrieker (umtot väöl groete voetballen de Speule links lete ligke) waor 't optrejje op 't WK vaan 1974, ouch in Wes-Duitsland. In de kwalificatie verrasde de Pole al door Ingeland oet te sjakele, later in 't toernooj bookde ze euverwinninge op Argentinië en Brazilië. Door e verluus tegen 't gasland woort de finale evels zjus neet gehaold.

Ouch aon 't WK vaan 1978 deeg Pole mèt en op de editie vaan 1982 maakden 't land weer indrök. Dit waor evels neet vaanzelf gegaange, umtot de sociaol oonras in 't Pole vaan dees jaore ouch in 't voetbalèlftal waor doorgedroonge. E vaan dissidente gezuverd èlftal haolde evels e geliekspeul tegen Italië en wis in de twiede grópsfaas vaan 't Belsj te winne. Oetindelek woorte ze weer daarde. In 1986 waor Pole minder succesvol; nao de poulefaas woorte ze in de achste finaal kansloes oetgesjakeld door Brazilië.

Heinao lökden 't Pole jaorelaank neet um ziech te plaotse veur e WK. Wel haolde in 1992 nog de zèlvere medajel op de Olympisch Speule (nog ummer e toernooj wat door de westerse len wieneg serieus woort genome). In 2002 waor 't Pools èlftal veur 't iers weer op e WK, zoe good wie in 2006; allewel tot Pole bei kiere wieneg presteerde, waor dit nao jaore al gans get. In 2008 stoont 't èlftal daobij veur 't iers op 'n Europees kampioensjap; ouch hei kaom 't neet door de grópsfaas. Twie jaor later, wie Pole es gasland otomatisch veur 't EK geplaots waor, lökde dat ouch neet. De WK's vaan 2010 en 2014 woorte neet ins gehaold. Veur 't EK vaan 2016 wis 'n opvallend sterk Pole ziech wel te plaotse; 't team haolde noe ouch de knock-outfaas.

Links bewirk