Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Odijk
Gewaeze gemeinte in Nederlandj

Oonofficieel waope vaan Odijk (zuug de teks)

Ligking vaan de kern Odijk mèt boetegebeed in de gemeinte Bunnik

Gevörmp 1817
Opgehaeve 1964
Opgegange in Bunnik
Provincie Utrech
Hoofplaats Odijk
Opperflaakde (bie opluffing) 6,48[1] km²
– daovan water: ? km²
Inwoeners (kort veur opluffing) 1.082 (1960)
deechde: 151,5/km²
Lies van börgemeisters

Odijk (Utrechs Ojik) is e dörp in de Nederlandse gemeinte Bunnik, provincie Utrech. Feitelek is 't ouch de hoofplaots vaan dees gemeinte, umtot 't raodhoes binne deze kern steit. 't Dörpke heet zoe'n 4.500 inwoeners. Odijk ligk direk zuidoostelek vaan Bunnik aon de N229 en de Kromme Rijn; d'n A12 sjeit de bei dörper. Ouch ligk Odijk op korten aofstand vaan Werkhoven, Zeist en Driebergen-Rijsenburg.

Aonzien bewirk

 
't Wit kèrkske vaan Odijk.

Odijk waor vaanajds e weegdörp, meh had ouch get vaan e kómpdörp. De groete weeg vaan Bunnik nao Wijk bij Duurstede (de veurluiper vaan d'n N229) maakde 'nen drej door de dörpskern, dee daodoor ineingeklap zaot.[1] Te beginne in de jaore 1950 is 't dörp mèt väöl nuibouw oetgebreid, zoetot 't 'n ech koompdörp woort, begrens door 'ne wije meander in de Kromme Rijn aon de noord-, oos- en zuidkant en door de groete weeg aon de weskant.

Vaan 't aajd dörp is neet väöl mie euver. In 't dörp gief 't welgetèld drei rieksmonuminte; dat is mèt 't boetegebeed mètgerekend.[2] Belaankriekste monumint is 't gotisch Sint-Heribertkèrkske (zuug foto). Hei en dao vint me nog - dèks verbouwde - aw boerderije.

De umgeving is evels bezunder beziensweerdeg. Neve de Kromme Rijn löp e paad wat väöl weurt gebruuk veur wandelrecreatie. Sinds de jaore negeteg is hei, wie in de ganse gemeinte, väöl gedoon um de revierkante natuurleker te make. Ouch vint me in 't boetegebeed väöl boumgaarde.

Historie bewirk

De Kromme Rijn waor in de Romeinsen tied de hoofluip vaan de Rijn en de grens vaan 't Riek. Odijk geit evels zelf neet trök op Romeinse wortele. De naom - in 'n achsteniewse akte gegeve es Iodichem, 'heim vaan Jodik' - is Germaans en verraojt 'n heerkoms oet de vreug middeliewe. De geneumde akte behandelt de sjinking in 732 vaan Fectio (Vechten) en diverse geujer in de umgeving (neve Iodichem ouch Bunninchem (Bunnik) en Uuercundia (Werkhoven)) aon de bisjop vaan Utrech. Pas in d'n twelfden of daartienden iew krijg Odijk e dörpskèrkske; nog later in de middeliewe weurt 't e zelfstendeg geriech. In de Fransen tied geit dat naojeloes in 'n gemeinte euver.

In 1964 weurt Odijk mèt Werkhoven aon de gemeinte Bunnik touwgeveug. De drei gemeintes deile daan al 'ne börgemeister en 'n amteleke organisatie. De sterke greuj, die inkel jaore deveur waor begós, woort nao de fusie doorgezat. Odijk woort 'n ech forenzedörp, wie Bunnik meh in tegestèlling tot Werkhoven, iewelaank groeter es Odijk meh allewijl e stök kleinder.

Historische inwoenertalle bewirk

Tot aon d'n Twiede Wereldoorlog sjogkelde de bevolking vaan Odijk oongeveer op 'tzelfde niveau. Pas daonao weurt deen trend umgedrejd en begint de gemeinte explosief te greuje, e perces wat bij de annexatie nog in volle gaank is.

Jaor Aontal Greuj (gans Utrech)
1830 339[3]
1840 369[4] +8,8% (+9,7%)
1849 423[5] +14,6% (+2,9%)
1859 451[6] +6,6% (+7,0%)
1869 428[7] -5,1% (+8,6%)
1879 414[8] -3,3% (+10,4%)
1889 425[9] +2,3% (+15,3%)
Jaor Aontal Greuj (gans Utrech)
1899 428[10] +0,7% (+13,6%)
1909 446[11] +4,2% (+14,9%)
1920 476[12] +6,7% (+18,7%)
1930 468[13] -1,7% (+18,9%)
1947 566[14] +20,9% (+35,0%)
1956 731[15] +29,2% (+15,3%)
1960 1.082[16] +48,0% (+7,4%)
Opmerking
  • Bij de volkstèlling vaan 1971 had de woenkern Odijk, daan deil vaan de gemeinte Bunnik, 2.935 inwoeners, boevaan 2.605 in de kern (aofgerund op ganse vieftalle).[17]
Rillatief oontwikkeling vaan 1830 tot 1971

(v1830=100)

Greun: gemeinte Odijk
Blauw: provincie Utrech

Waope bewirk

Odijk had gein officieel waope, meh gebruukde wel 't volgend taffereel es oonofficieel waope:

In zèlver (wit) Sinterklaos mèt de kuip en de kinder, in d'n achtergroond 'n kèrk, alles besjene door 'n zon, alles vaan natuurleke kleur.

Dit waope is ouch in 't waope vaan de fusiegemeinte Bunnik opgenome.[18] 't Geit hei evels um 'ne gereduceerde vörm, mèt Sinterklaos en de drei kinder in e beutsje en zoonder zon en kèrk.[19]

Rifferenties bewirk

  1. 1,0 1,1 - Gemeente Atlas van Nederland, 1865-1870 - Gemeente Odijk
  2. Rieksmonuminte in Odijk
  3. Volkstèlling 1830
  4. Volkstèlling 1840 - Provincie Utrech
  5. Volkstèlling 1849 - Provincie Utrech - Gemeintesgewijs indeiling
  6. Volkstèlling 1859
  7. Volkstèlling 1869
  8. Volkstèlling 1879 - Provincie Utrech
  9. Volkstèlling 1889 - Provincie Utrech
  10. Volkstèlling 1899 - Provincie Utrech
  11. Volkstèlling 1909: Diechheid vaan de bevolking
  12. Volkstèlling 1920 - Plaotseleke indeiling
  13. Volkstèlling 1930
  14. Volkstèlling 1947
  15. Woeningtèlling 1956
  16. Volkstèlling 1960
  17. Volkstèlling 1971 - Plaotseleke indeiling
  18. Heraldrywiki - Odijk
  19. Heraldrywiki - Bunnik
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Odijk&oldid=395547"