Nissewaard

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Gemeinte Nissewaard

Provincie

Zuud-Hollandj

Hoofplaats

Spijkenisse^[1]

Börgemeister (lies)

Mirjam Salet (PvdA)^[2]

Opperflaakde
– daovan water

98,74 km²
16,49 km²

Inwoeners
– deechde:

84.929 (1-5-2014)
1.033/km²

Nissewaard is 'n gemeinte in de Nederlandse provincie Zuid-Holland, op 't eiland Voorne-Putten. Ze is op 1 jannewarie 2015 gevörmp oet de opgelufde gemeintes Spijkenisse en Bernisse. Neve de hoofplaots Spijkenisse umvat de gemeinte de kerne Abbenbroek, Geervliet, Heenvliet, Hekelingen, Oudenhoorn, Simonshaven en Zuidland,^[3] zoewie 't oonder de kern Simonshaven vallend gehuch Biert.^[4]

Historie bewirk

De fusie pas in 'nen trend vaan sjaolvergroeting die de aofgeloupe jaore ouch aon de provincie Zuid-Holland neet veurbijgóng. Me wèlt groeter gemeintes vaan zeker 25.000 inwoeners; in de lendeleke politiek goon zelfs stumme op veur nog väöl groeter gemeintes. De plattelandsgemeinte Bernisse waor mèt zoe'n 12.00 inwoeners - 'n aontal wat daobij nog aofnump - dudelek te klein. 'n Fusie mèt 't väöl groeter Spijkenisse laog daorum veur de hand.

Oondaanks tot 't zwuurtepunt in alle opziechte bij Spijkenisse ligk, besloot me veur de nui gemeinte neet 'Spijkenisse' te neume. Me sjreef 'n priesvraog oet oonder de bewoeners. Twie Spijkenissenere deende de naom Nissewaard in, boe allebei de gemeintes mèt instumde.^[5]

Politiek bewirk

Op 14 november woorte in 't touwkumsteg Bernisse verkezinge veur de gemeinteraod gehawwe. Wiedoet de groetste partij woort ONS, 'n lokaol partij oet Spijkenisse. De gansen oetslaag waor de volgende:^[6]

ONS	13
PvdA	5
VVD	4
TROTS	3
SP	3
CDA	3
LOB	2
ChristenUnie/SGP	2
D66	2

De opkoms laog mèt zoe'n 35% bezunder lieg.^[6]

Börgemeister bewirk

Mirjam Salet vaan de PvdA woort aongestèld es woernummende börgemeister vaan de fusiegemeinte. Zij is sinds 2007 al börgemeister vaan Spijkenisse en vervölde 'tzelfde beroop ieder al in 's-Gravendeel en Hoogezand-Sappemeer.^[2]

Insignes bewirk

E gemeintelek waope is al door de gemeinteraod goodgekäörd en wach noe op e Keuninklek Besluut. Dit waope liet ziech zoe umsjrieve:

Doorsnoje: I. Gedeild: a. in goud (geel) 'nen umgewenden, aonziende liew vaan keel (roed), getongk en genageld vaan lazuur (blauw); b. doorsnoje in zès stökker vaan lazuur en goud, op de lazure belk nege verkorte andreaskruiskes gezat 4, 3 en 2; II. in sinopel (greun) 'ne golvenden dweersbalk vaan zèlver (wit).^[7]

Deil a is 't waope vaan Voorne, 't sjijnt te zien aofgeleid vaan 't Hollands waope. Deil b is 't aajd waope vaan Spijkenisse en 't nog awwer waope vaan gans Putten. 't Waope vaan Bernisse droog 't waope vaan Voorne en 'ne variant vaan 't Puttens waope mèt gouwe in plaots vaan zèlvere kruiskes.^[8]^[9] 't Oonderste deil stèlt, nao me maag aonnumme, 't reveerke de Bernisse veur.