Margrethe Vestager
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Margrethe Vestager (Glostrup, 13 april 1969) is 'n Deens politika en allewijl d'n eurocommissaris veur Merretkompetitie in de Europees Kemissie[1] sinds 2014 (iers oonder Kemissie-president Jean-Claude Juncker, daonao oonder Kemissie-president Ursula von der Leyen) en zie is vice-president vaan de Europees Kemissie sinds 2019 in 't Von der Leyen-kabbinèt. Vestager is lid vaan de Radikale Venstre, 'n Deense liberaole partij die op EU-gebeed deil oetmaak vaan Renew Europe, tot 2019 bekènd oonder de naom ALDE (boe ouch de Nederlandse VVD en D66, de Vlaomse Open Vld, de Waolse Mouvement Réformateur en de Duitse FDP en Freie Wähler aon zien geallieerd)[2]. Zie is allewijl veural bekind vaan de historisch groete boetes die zie in naom vaan de Europese Unie versjèllende, veural Amerikaanse bedrieve heet opgelag. De twie bekèndste veurbeelde vaan die boetes zien die vaan Google en Apple gewees [3][4].
In 1993 góng Vestager studere in Kopehage. Op 20 november 2001 trooj zie 't Deens parlemint binne. Op 3 oktober 2011 woort zie de vice-premier en minister vaan ikkenomische en binnelandse affaires oonder Helle Thorning-Schmidt. Op 1 november 2014 woort zie d'n Deensen eurocommissaris oonder 't kabbinèt vaan Jean-Claude Juncker en leet zie Kopehage achter veur Breusel[1]. Zie góng deil oetmake vaan de Kemissie oonder Juncker, die op dat memint de Kemissie vaan de Portugees José Manuel Barroso verving. Zie nom daomèt 't Deens commissarissjap euver vaan Mariann Fischer Boel (Eurocommissaris vaan Agricultuur en Plattelandsoontwikkeling) en nom 't comissarissjap op Merretkompetitie euver vaan de Spanjool Joaquín Almunia[5].
Boetes bewirk
Vestager oontving lof wie ouch kritiek veur de historisch hoege boetes die zie oetdeilde aon versjèllende bedrieve weges 't sjende vaan ierleke kompetitie op de financiële merret. Google oontving 'n boete vaan 2,4 mieljaard euro veur misbruuk vaan zien dominante positie op ein merret (zeukmesjienes) um veurdeile te bereike op 'n aander (priesvergelieking). Google heet dees keuze oonrechveerdeg geneump mer heet wel gezach de boete te gaon betaole. Wijers is Google door Margrethe Vestager aongeklaag veur misbruik vaan zien dominante merretpositie veur besturingssysteme vaan, beveurbeeld, smartphones en veur oetbuiting vaan de dominante positie binne reklaam die gelink is aon zeukopdrachde. Apple oontving 'n boete vaan 13 mieljaard euro, de hoegste boete die e bedrief heet oontvange vaan 'n Europese regiering. Dit waor umtot Apple staotssteun oontving vaan Ierland in de vörm vaan belastingveurdeile. Apple is recentelek in beróp gegaange. Ouch höbbe versjèllende vrachwagebedrieve 'n boete oontvange umtot zie zien aongeklaag door Vestager veur 't stiekem make vaan priesaofspraoke. Daoneve zien Amazon, Gazprom, McDonald's en Facebook ouch aongeklaag [3][4].
Rifferenties bewirk
- ↑ 1,0 1,1 Russischtaolege versie vaan dit Wikipedia artikel
- ↑ Officiele, Ingelstaolege website vaan ALDE
- ↑ 3,0 3,1 'Deze inspiratiebron voor de serie Borgen bindt in Brussel de strijd aan met Google, Facebook en Amazon', oet: De Correspondent (Nederlandstaoleg), 14 augustus 2017. Vertaold oet 't heioonder weergeve Deenstaoleg artikel
- ↑ 4,0 4,1 '“Jeg er ikke bange for at blive bange.” Vi mødte verdens mest magtfulde dansker på en skæbnedag i Bruxelles', oet: Zetland (Deenstaoleg), 10 juli 2017
- ↑ Ingelstaolege versie vaan dit Wikipedia artikel