Maharishi Mahesh Yogi
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Maharishi Mahesh Yogi (12 januari 1918, bij Jabalpur, India - 5 fibberwarie 2008, Vlorp) waor 'nen hindoeïstische lieraar (yogi), dee de transcendentaal meditatie bedach en in de Westerse wereld verspreide.
Biografie bewirk
De Maharishi studeerde aon de universiteit vaan Allahabad aof in de natuurkunde. In 1955 kaom 'r, naotot 'r ziech twie jaor in de heuvele aon de voot vaan de Himalaya had trökgetrokke, mèt zien lier vaan sumpel meditatie, die heer transcendentaal meditatie of kort-eweg TM duipde. Heer zètde daoveur 'n kluisenerij aon de reveer de Ganges op. Twie jaor later stiechde heer de Spiritueel Herwinningbeweging, de ierste vaan de väöl beweginge die later same de TM-beweging geneump zouwe weure.
In de jaore zesteg späölde Indiase mystiek 'n groete rol bij de tegecultuur; daovaan profiteerde de Maharishi door bij väöl westerlinge de TM te oonderwieze. Zoe waore de Beatles en de Beach Boys zien lierlinge (zuug ouch Hare Krishna). Later zouwe Clint Eastwood en David Lynch ouch zien lier goon beoefene. Volges hun eige promotiemateriaol höbbe intösse neet minder es vief tot zes miljoen lui de beginsele vaan de TM oonderweze gekrege.
In 1990 vestegde heer ziech in Vlorp, gemeinte Roerdale, woe heer op 't terrein vaan 'n aajd-kloester in Nationaol Park De Meinweg, kortbij de naobersjap Vlorp-Sjtatie e centrum veur zien meditatielier leet bouwe. In oktober 2000 reep heer dao de "Global Country of World Peace" oet. In 't dörp Vlorp greujden 'r oet tot 'ne cultfiguur, en hei kin me inmiddels op väöl plaotse betaole mèt de raam, 't geld vaan de Global Country. Zien eis tot 't kloester op zie terrein aofgebroke mós weure umtot 't zuidoostelek, neet oostelek georiënteerd waor (en daodoor de harmonie op zien universiteit zouw versteure; zien volgelinge waore al begós) had 'm evels in probleme gebrach mèt 't gemeintebestuur.
Op 5 fibberwarie 2008 sjtórf d'r Maharishi in Vlorp. Zien lief is nao India gebrach en in de stad Allahabad aan d'n oever vaan de heilige revier de Ganges gecremeerd.[1]
Lier bewirk
't Groondbeginsel vaan zien lier is de mystieke filosofie oet de veda's in de modernen tied nui leve in te bloze, en wel mèt wetensjappeleke oonderbouwing. 't Góng 'm daobij neet um 't geluif in de doezende Vedische gode; de meditatielier moot veur alle lui mèt wat veur 'ne religieuzen achtergroond daan ouch touwgenkelek zien. Volges de Maharishi zien in alle culture wijs lui gewees, die op ein of ander meneer drop geweze höbbe tot de brón vaan al 't weite ligk bij volmaakde rös in staot vaan volmaakde wakkerheid, woedoor me gelök erveurt. De situatie door dees meditatie bereik kint me transcendentie neume, meh hèt in ander religies/culture hiemel, nirwana, samadhi of absoluut weze. In alle culture is dat zoe good wie verlore gegaange, meh wijze wie Zjezus, Boeddha, Krishna e.d. koume door wat feitelek transcendentaol meditatie waor in 't verleie al tot dezelfde conclusies. Zien lier en väöl aspekte daovaan verwèrkde heer in versjèllende beuk.
De waardering veur zien lier is wisselend. Sommege vinde zien lier get te gemekelek, te touwgenkelek en aontrèkkelek veur de gemiddelde mins (en neume 'm 'ne charlatan). Väöl critici höbbe ouch bezwoer tege 't feit tot heer de Vedische gode in zien gesjrifte opneump; daodoor zouw zien lier toch neet zoe tiedloos en veur alle culture touwgenkelek zien es heer zelf beweert.
Referentie bewirk
- ↑ Maharishi gecremeerd, De Limburger, 11 fibberwarie 2008