Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Leidschendam
Gewaeze gemeinte in Nederlandj

Waope vaan Leidschendam (zuug de hoofteks)

Aw gemeinte Leidschendam (greun) tege de huiege gemeintegrenze (dikke witte lijne)

Gevörmp 1938
Opgehaeve 2002
Opgegange in Leidschendam-Voorburg
Provincie Zuid-Holland
Hoofplaats Leidschendam
Opperflaakde (bie opluffing) 37,86[1] km²
– daovan water: 2,03[1] km²
Inwoeners (kort veur opluffing) 36.199 (1999)[1]
deechde: 968[1]/km²
Lies van börgemeisters
Dörpskèrk en hoezer op de Delfsekaoj aon de Vliet in Leidschendam

Leidschendam is e versteidelek dörp in de Nederlandse provincie Zuid-Holland, ein vaan de kerne (de hoofplaots) vaan de gemeinte Leidschendam-Voorburg, mèt zoe'n 28.000 inwoeners. De bebouwing is vergreujd mèt die vaan Voorburg, welke plaots weer gans aon D'n Haag vaszit. Daomèt is Leidschendam typisch 'n veurstad vaan D'n Haag.

Waope bewirk

Op 14 november 1938, nog in 't jaor vaan häör stiechting, kraog de gemeinte Leidschendam vaan d'n Hoege Raod vaan Adel 't volgend waope touwgekind (zuug d'n tabel veur e pleetsje):

In zèlver (wit) 'ne golvenden dweersbalk vaan lazuur (blauw), belaoje euver zien huugde mèt 'ne verkorte paol vaan goud (geel), de paol belaoje mèt twie sjuinsgekruisde sleutele vaan keel (roed); bove de balk 'ne wasseneer vaan sabel (zwart) en dao-oonder 'nen hertekop vaan keel. 't Sjèld gedèk mèt 'n gouwe kroen vaan drei blaajer en twie perele.[2]

't Waope combineert eleminte oet de waopes vaan de stiechtende gemeinte: de wasseneer veur Veur (wat 'rs drei in zie sjèld had) en d'n hertekop veur Stompwijk (dee zie waope e gans hert tuinde). 't Middedeil is sprekend: in 'ne waterluip zuut me de stad Leiden häör waope mèt de twie sleutele vaan Petrus.[2] Eleminte oet 't Leidschendams waope zien later weer opgenome in 't waope vaan Leidschendam-Voorburg.[3]

Historie bewirk

Leidschendam is oontstande aon de Vliet, e kenaal wat d'n Awwe Rijn (bij Leiden) mèt de Schie (bij Overschie, noe Rotterdam) verbint en 'n vervaanging is vaan e nog väöl awwer Romeins kenaal. 't Kenaal kaom door twie hoegheimraodsjappe (watersjappe) - Rijnland en Delfland. Oonder graof Floris V vaan Holland woort ind daartienden iew ('n oerkónde oet 1285 neump ze) 'n landsjeiing tösse die twie ingestèld. Umtot ze e versjèllend waterpeil aonhele, gaof dat probleme veur de Vliet en mós bij de landsjeiing 'nen dam koume. Umtot handelere (en väöl later ouch trèksjuutpassageers) hei ummer móste euverstappe, kós hei e dörp oontstoon: Leidschendam.

't Dörp greujde gestiedeg wijer en in de zeventienden iew kraog 't 'n dörpskèrk in de stijl vaan 't Hollands classicisme, nao oontwerp vaan Arent van 's-Gravensande (foto). De neogotische Pieters- en Paulskèrk volgde roond 1880. Al deen tied evels waor 't dörp neet zelfstandeg. 't Waor oontstande op 't groondgebeed vaan twie awwer entiteite, de hierlekheid Veur en 't dörp Stompwijk. Pas in 1938 kaom dao 'n ind aon: mèt de fusie vaan Veur en Stompwijk oontstoont de gemeinte Leidschendam. 't Dörp greujde veural nao d'n Twiede Wereldoorlog oet tot 'n echte veurstad. In 2002 góng Leidschendam same mèt Voorburg de gemeinte Leidschendam-Voorburg vörme; heibij stoont 't de wiek Leidschenveen aon de gemeinte D'n Haag aof (te zien op 't keertsje). 't Dörp Stompwijk en de naobersjap Wilsveen (allebei nog ummer lendelek vaan karakter) gónge wel nao de nui gemeinte mèt.

Sinds vrij kort zien inkel internationaol tribbenaole, die te make höbbe mèt de positie vaan D'n Haag es stad vaan internationaol (oorlogs)rech, in Leidschendam gevesteg, wie dat veur Libanon en Sierra Leone.

Historische inwoenertalle bewirk

jaor aontal
1947 10.566[4]
1956 13.863[5]
1960 16.366[6]
1971 19.465[7]
Opmerkinge
  • T'r vergelieking: de vörmende gemeintes Veur en Stompwijk hadde in 1930, ach jaor veur de sameveuging, same 8.702 inwoeners.[8]
  • 't Inwoenertal veur 1971 is aofgerund op ganse vieftalle.

Bron bewirk

Dit artikel is gebaseerd op 't corresponderend Nederlandstaoleg artikel, en wel in dees versie.

Rifferenties bewirk

  1. 1,0 1,1 1,2 1,3 Gemeente op maat 1999 - Leidschendam
  2. 2,0 2,1 Heraldrywiki - Leidschendam
  3. Heraldrywiki - Leidschendam-Voorburg
  4. Volkstèlling 1947
  5. Woeningtèlling 1956
  6. Volkstèlling 1960
  7. Volkstèlling 1971
  8. Volkstèlling 1930

Extern links bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Leidschendam&oldid=460284"