Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Lei (Leopold Hubertus) Molin (Berg, 16 augustus 1927 - Eindhoven, 10 januari 1990)[1] waor 'ne Nederlandse kunssjilder. Hae waor getrouwd mit de galeriste Nine van Caldenborgh [2]

Werk bewirk

't Oeuvre van Molin ies te verdeile in drie periodes:

  • 1944-1967: zien vreug werke zint figuratief en zint beïnvlood door 't impressionisme. Hae maakde väöl gebruuk van kleur en sjilderde landsjappe, dörpsgeziechter en portrètte.
  • 1968-1985: in de jaore zestig verhuusde Molin nao Noord-Holland. Hie huèrde hae bie de zoagenaamde Amsterdamse Limburgersj. In Amsterdam kaom zien werk ónder invlood van Cobra en 't minimalisme. Hae góng abstrak werk make, de oetbundige kleure verdwene oet zien sjilderieje en hae maakde veural gebruuk van wiet, zjwart en gries.
  • 1985-1990: vanaaf 't miedde van de jaore 80 kaom d'r weer miè kleur in zien werke.

Leve bewirk

Lei Molin woort gebore in e gezin mèt veer kinger in Berg. Hae volgde de MULO in Mestreech en denao cursusse steno en type. Mèt zevetièn jaor maakde hae de definitief keus um kunstenaer te were. Hae houw ummer al väöl geteikend en waor in zien jeug al in contak gekómme mèt kunssjildersj die 't pittoresk Berg en de umliegkende heuvele kaome sjildere.

Van 1944 bies 1946 volgde hae lèsse op de Maastrichtse Kunstnijverheid School, de later Sjtadsacademie. In de jaore vieftig volgde hae incidenteel lèsse op de Académie Julian in Paries. Wiejer ies hae groatendeils autodidak. In 1949 heel Molin zien ièrsjte tentoansjtèlling in Berg, mèt landsjappe, sjtilleves en portrètte. In 1950 woort hae lid van de Valkebergse kunskrink "Henri Jonas" (geneump nao de Mestreechse beeldend kunstenaer Henri Jonas).

In de jaore 50 góng Molin väöl op reis, ónder andere nao Zjwitserland, Sjpanje (Ibiza) en Frankriek (veural nao Paries). In 1953 brook hae door es sjilder mèt 'n expositie in 't Sjpaans Leenhof in Valkeberg. Hae kaom hie in contak mèt Charles Eyck, dae de tentoansjtèlling bezoch en de jónge kunstenaer vroog um same te exposere. Eyck zou tot 't ing van de jaore 50 väöl invlood op 't werk van Molin höbbe. Hae woort noe ouch boete Limburg bekènder en kreeg gooj kritieke in gezètte en tiedsjriefte. Molin trouwde mèt Nine van Caldenborgh.

Aan 't ing van de jaore 50 veranderde de sjtiel van Molin. 't Regionaal element verdween bienao gans en maakde plaats veur invlood van Cobra en abstrak expressionisme. Zien werk woort ummer abstracter en minder figuratief. Zien kleurgebruuk veranderde ouch: wiet en gries krege de euverhand, daoneve gebruukde hae sóms blauw, oranje en greun.

In de jaore 1962-1963 woort in zien geboortedörp Berg de sjutterie opnuuj opgeriech. Lei, dae ongertusje op de Plenkert in Valkeberg woonde, houw ’t idee de uniforme van De Nachwach van Rembrandt van Rijn model te laote sjtaon. Dus woort de naam van de nuuj sjutterie Nachwachgilde. [3]

In augustus 1964 riechde Molin mèt 9 ander kunstenaersj de sjtiechting "Artishock" op. Dees sjtiechting wol de sjtad Mestreech choquere; de kunstenaersj vónge dat de sjtad achterleep op cultureel gebeed en dat d'r te wiènig expositiemeugelikhede veur modern kuns waore. Artishock organiseerde daorum versjillende tentoansjtèllinge. De sjtiechting kreeg èvvel ouch hevige conflicte, bieveurbeeld mèt de börgemeister van Mestreech, W. Michiels van Kessenich.

In 1967 vertrok Molin mèt zien vrouw en drie zone nao 't noorde, woa de Amsterdamse Limburgersj‎ (ónder andere Pieter Defesche, Jef Diederen en Ger Lataster) ziech gevestig houwe. Hae góng wone in Overveen. Hie góng hae 'n eige abstracte sjtiel óntwiekkele, woabie hae bieveurbeeld verf, potload en kriet combineerde. Ouch gebruukde hae collagetechnieke en papier es beeldend materiaal.

In 1974 reisde hae mèt 'n beursj van 't ministerie van CRM nao New York, woa hae kènnismaakde mèt Minimal Art en Op Art. Wie hae truukkaom verhuusde hae nao Bloemendaal. De kunsindrukke oet de VS kaome truuk in 't werk dat hae hie maakde.

In 1979 verhuusde Molin allein nao IJmuiden, woa hae inspiratie opdeeg in de have. Hae woort productiever en langzaam kaom ouch de kleur weer truuk in zien werk.

Weblinks bewirk

Rifferensies bewirk

  1. Database RKD – Nederlands Instituut voor Kunstgeschiedenis
  2. Database RKD – Nederlands Instituut voor Kunstgeschiedenis
  3. Historie op nachtwachtgilde.eu
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Lei_Molin&oldid=456549"