Kesjtièl Cortenbach

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Voelendesj, es te dit dialek sjpriks.

Kesjtièl Cortenbach liek ten oaste van 't dörp Voelender in de gelieknamige gemeinte Voelender in Zuud Limburg. De Hoonsbaek, hie de Cortenbachbaek geneump, sjtruimp langszie en veurzuut grachte róntelum en vösjvieversj van water. De umgeving ies moerassig.

lKesjtièl Cortenbach in 2007

't Landhoes ies opgetrokke in klassisistische sjtiel rónd 't jaor 1700 op de fundamente van 'ne miedelièwse börch. Van de verdwene veurbörch sjtoon nog 2 rón hooktores mèt sjpietse daker (15e ièw). Zie zint geboewd in kundersjtein.

Sjlothaof bewirk

 
De Haof van Cortenbach in 2007

Bie 't complex huèrt ouch de monumentaal carréboerderiej oet 1640, geboewd in Maaslandse renaissance door generaal baron von Schnetter. De opriejlaan veurt nao 't poortgeboew mèt róndbaogpoort en tore mèt 'ne unvörmige leie daaksjpiets. Dit ies nog 'n res van de veurbörch. Bove de poort 'n helsjteine waope van Lamberts-d'Aspremont en 't jaortal 1725 (van 'n verboewing). De boerehaof haet nóg twiè tores mèt leie daker, alletwiè andersj van vörm.

Historie bewirk

De oudste gegeves datere oet de 14e ièw. In 1371 woort Gerard van Cortenbach, zoon van Willem hièr van De Berg (Ubaghsberg), beliènd door de hertog van Brabant mèt grónd in Cortenbach en op ten bergh. Gerard waor 'ne vazal van de aartsbiesjop van Kölle vanwege ziene haof in Cortenbach. 't Kesjtièl ies geboewd door de zoon, Goswijn van Cortenbach. 't Gesjlach van Cortenbach, dat ouch in Helmond regeerde, sjtorf oet in de 17e ièw. In 1682 woort de wölhandelaer Herman Lamberts eigenaer.
In 1986 kaom d'r in restaurant in 't kesjtièl. Tegewoordig ies 't es kentoar in gebruuk.

 
Commons
In de categorie Cortenbach Castle van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kesjtièl_Cortenbach&oldid=440680"