Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


John Mieremet (10 mei 1960 - Pattaya, 2 november 2005) waor 'ne Nederlandsen drögkshandeleer, die gezeen weurt es eine vaan de veurnaomste kopstökker in de organisatie vaan topcrimineel Klaas Bruinsma. Heer weurt dèks in einen aosem geneump mèt Sam Klepper, neve wee heer in Neerpelt e tiedsje woende en mèt wee same heer de bijnaom Spik en Span had. Same weure ze gezeen es absolute topfigure oet de Nederlandse criminaliteit roond 't jaor 2000.

In jannewarie 2001 woort Mieremet gearresteerd op verdinking vaan mètpliechtegheid in d'n aonslaag op Cor van Hout. Later zouw heer in e gesprek mèt Van Hout höbbe touwgegeve achter d'n aonslag te zitte. Op 26 fibberwarie 2002 woort heer zelf 't slachoffer vaan 'nen aonslag, eve naotot heer mèt Evert Hingst, avvekaot vaan e groet aontal criminele en zelf ouch verdach vaan misdaod, gesproke had. Mieremet euverleefde d'n aonslag en verklaorde later tot heer door Hingst in de vol gelok waor, in verband mèt ooneinegheid euver betaolinge mèt o.m. Willem Endstra.

In 2004 vertrok Mieremet nao Thailand, woe heer góng investere in 'n vasgoodoondernumming. Op 2 november 2005 woort heer dao in zie ketoer geliquideerd, 2 daog nao Evert Hingst. Bei liquidaties hure in 'n lang serie vaan aofrekeninge in 't Amsterdams crimineel miljeu, en meugelek waor dees liquidatie 'n direkte vergelling veur die op Hingst.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=John_Mieremet&oldid=433858"