Iris (planetoïed)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Iris (officieel: 7 Iris) is 'n groeate planetoïed in 'n baan tösse de planete Mars en Jupiter. Iris haet 'ne gemiddeldjen diamaeter van zoeaget 200 km en is daomit ein vanne grótste vief planetoïde vannen S-tuup. Iris bevindj zich gemiddeldj op zoeaget 2,39 astronomische einheje vanne zón aaf, tródsdet zien baan sterk ellipsvörmig is en d'n aafstandj toete zón sterk kan versjille. Ze volbringk 'nen ómloup rónjelómme zón in 3,68 jaor.

Vanaaf de aerd gezeen haet Iris tiejes opposities 'n gemiddeldje sjienbaar klaorheid van +7,8, aeve klaor wie de planeet Neptunus. Tiejes gunstige opposities (wen Irisi zich inne buurt van zie perihelium bevindj) kan ze 'n klaorheid van +6,7 bereike, zoeadet ze mit 'ne sumpele verrekieker zichbaar is.

Iris woort op 13 augustus 1847 óntdèk doren Ingelse sterrekóndige John Russel Hind. Hind zów detzelvendje jaor onna de planetoïed 8 Flora óntdèkken en later nag ach anger planetoïde. Iris is verneump gewaore nao Iris, de godin vanne raengerbaog en boeadsjapbringer vanne gaoje inne Griekse mythologie, mit naam vanne oppergodin Hera. De planetoïed haet dees naam bekómme van Hind wie d'r 'm óntdèkdje dewiel d'r zóch nao de planetoïed 3 Juno; Juno is de Romeinse naam veur Hera.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Iris_(planetoïed)&oldid=419236"