Hongaars hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Ferenc Puskás en Nándor Hidegkuti op 'ne match in 1954 Boedapest.

't Hongaars hierevoetbalèlftal späölt voetbalinterlands veur Hongarije. 't Team weurt gereguleerd door de Magyar Labdarúgó Szövetség (MLSZ). Hongarije waor al veur d'n Twiede Wereldoorlog eint vaan de beter voetballen op de wereld, meh kaom tot zien huugdepunt in de jaore 1950. Daonao góng 't minder; allewijl is Hongarije al tientalle jaore gei sterk voetballand mie.

Historie bewirk

't Hongaars èlftal woort in 1902 opgestèld. Hongarije waor toen nog deil vaan de Donaumonarchie, meh um zien groete otonomie moch 't zien eigen èlftal höbbe. D'n iersten interland waor tege d'n aandere riekshèlf, Oosteriek, en góng mèt 5-0 verlore. Oosteriek en Hongarije zouwe in de ierste jaore nog dèks tegenein speule. Ouch Ingeland waor in deen tied te sterk, zoewel in 1908 es 1912 verloor Hongarije mèt 7-0 vaan dit team.

Nao d'n Ierste Wereldoorlog woort Hongarije, wie de aander Centraole, oetgeslote vaan internationaol toernoje wie de Olympische Speule. In 1924 mochte ze wel mètdoen, meh maakde ze neet väöl indrök. Tegen 't ind vaan dat decennium kaom de vaart drin: Fraankriek woort in 1927 mèt 13-1 verslaoge. In 1934 deeg Hongarije veur 't iers mèt aon e WK; 't haolde de kwartfinaal. Veer jaor later kaom 't land zelfs in de finaal te stoon, boe 't mèt 4-2 vaan Italië verloor.

De groete successe kaome in de jaore 1950, mèt 'n generatie die de Magische Magyare woort geneump. Staarspeuler waor de spits Ferenc Puskás, dee in 't boeteland bij Real Madrid góng speule (oongebrukelek in deen tied) aon e gemiddelde vaan bekans eine goal per wèdstrijd kaom; aander groete speulers waore Sándor Kocsis, sjaduwspits Nándor Hidegkuti en aonvallende middevelder József Bozsik. 't Ierste groet succes waor 't winne vaan de gouwe Olympische medajel in 1952, boe ze oonder mie mèt 6-0 vaan de regerende kampioen Zwede wonne. In 1953 versloog Hongarije Ingeland op Wembley mèt 3-6. Dit waor d'n ierste kier in 90 jaor tot 't Ingels èlftal toes geklop waor en de wèdstrijd góng de beuk in wie 'match vaan d'n iew'. Datzèlfde Ingeland woort e paar maond later in Boedapest mèt 7-1 ingemaak. Op 't WK vaan 1954 waore ze topfavoriet. In de finaal tege Duitsland kaome ze vot mèt 2-0 veur, meh oetindelek woort de wèdstrijd mèt 2-3 verlore. D'n oonverwachde wereldtitel vaan Duitsland steit bekind es 't 'woonder vaan Bern.' Deze match is d'n insegste tösse 1950 en 1956 boe-in Hongarije woort geklop.

In 1956, 't jaor vaan de Sovjet-Russischen inval in Hongarije, verdeidegden 't land zienen Olympischen titel neet. In 1960 deeg 't dat wel en haolde 't team broons. In 1964 en 1968 pakde Hongarije weer de gouwe medajel, gevolg door zèlver in 1972 meh intösse waore väöl westerse len neet mie op Olympische Speule goon voetballe umtot 't toernooj gein profspeulers touwleet. De rizzeltaote op de WK's vaan 1958, 1962 en 1966 waore ouch wied vaan aonsprekend, en in 1970 wis t ziech gaaroet neet te plaotse. Ouch op volgende WK's haolden 't land mer maotege rizzeltaote en kaom 't neet wijer es de ierste runde. In de jaore negenteg woort 't allemaol nog erger, en de jaore nul boje mer marginaol verbetering. Op de Olympische Speule vaan 1996 nao haolde 't land nao 1986 noets mie e groet toernooj.

Hei-aon kaom 'n ind wie 't Hongaars team ziech plaotsde veur 't EK vaan 2016. 't EK hadde ze zelfs als sinds 1972 neet mie bereik; 't interval vaan 10 EK's zoonder deilnaome is mèt aofstand 't groetste in de historie vaan dit toernooj. Hongarije maakde indrök mèt 'ne wins op Oosteriek en e geliekspeul tege Portugal, meh verloor oetindelek in de achste finaal mèt 4-0 vaan 't Belsj.