Funs van Grinsven
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
Funs van Grinsven - Gebaore te Venlo 16 september 1908. Gestorve te Venlo op 18 augustus 2003 waas zenger, dichter, kómpenis, akteur en teksdichter.
Funs van Grinsven studeerde in de jaore 30 van d'n vurrige iëw aan de toniélschoeël in München. Oét heimwee schreef Funs 't leedje " Venlo, stedje van lol en plezeer". Dit nummer makde van Funs ein bekindheid in Venlo (en wièd dao boète). Tiejes de Vastelaovend van 1938 zweijde Funs d'n scepter euver 't Venlose Jocus-riek as Prins Funs 1.
Tiejes d'n oorlog werkde Funs beej 't Roeëje Kruuts, wao hae zien Amerikaanse vrouw Mary ouk lièrde kinne. Zien functie beej 't Roeëje Kruuts stelde um ouk in staot um ónderduikers te helpe. Nao d'n oorlog ging Funs aan de slaag beej de drökkerie van ziene Pap, Drukkerij van Grinsven. Ónder de puinhuip van zien platgebómbardeerd elderlik hoès aan de Remundsestraot vónd Funs kort nao d'n oorlog ziene alde prinsemantel truùk. Dit insprireerde Funs tot 't schriève van ein leedje waat ziër succesvol woord in de Venlose revue, Venlo mien Ald. Deze mantel is in later jaore nog door diverse Venlose stadsprinse in d'n Venlose vastelaovesoptoch meigedrage.
Funs traoj regelmaotig op beej Jocus en in de Venlose Revue's met o.a. Frans Boermans en Annie Renkien, daobeej begeleid door Giel Aerts.
Ind jaore 80 traoj Funs nog maar hièl aaf en toe op, meistal same met Annie Renkien. In 1996 aevel woord Funs gevraog um zien "evergreens" weer ens veur ein groeët publiek veur te drage. Dit optraeje, waobeej Funs begeleid woort door Glenn Corneille op piano, waas tiejes de 1e oètveuring van Nappes op de Proms. Vanaaf dit moment stónd Funs weer met groeëte regelmaot op de bühne, waobeej zien optraeje same met Glenn Corneille, Slagerij Van Kampen én 100 trommelaers, tiejes de overture van 't Venloos Zomerparkfeest in 1996 tot de meis spraakmakende behuùrde. Heej kreeg Funs 't klaor um 16.000 minse as koeër mei te laote zinge.
In 't jaor 2002 schreef Baer van der Meij, op verzeuk van Veldeke krink Venlo, 't book " Euver Funs gespraoke " 'nne gas verhaole en verhäölkes verteld door Funs van Grinsven aan Baer van der Meij.