Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Horizont vaan Dubai vaanaof de ziekant nao de weuste gezeen. 't Hoeg, spits touwloupend gebouw rechs is de Burj Khalifah.

Dubai (Arabisch: دبي‎ dubayy, mèt 't accent op de lèste syllaab) is 'n stad in de Vereinegde Arabische Emiraote. 't Is de hoofstad vaan 't gelieknaomeg emiraot en mèt zoeget 3,4 mieljoen inwoeners de groetste stad vaan 't land. Same mèt Sharjah en Ajman vörmp 't ein agglomeratie vaan bekaans zès mieljoen lui.

Dubai oontwikkelde ziech al in de koloniaolen tied tot 'n belaankrieke handelsstad; 'n oontwikkeling die nao de oonaofhenkelekheid hendeg snel is gegaange. 't Emiraot heet wel olie aongeboord, meh de groetste bron vaan inkomste höbbe ummer in d'n deenstesector gelege. Sinds 't ind vaan d'n twintegsten iew is Dubai veural sterk op vasgoodgebeed: de touwnummende riekdom en 't greujend aontal lui maakde tot de stad in korten tied vol woort gebouwd mèt wolkekretsers. Heioonder is ouch de Burj Khalifah, 't hoegste gebouw op de wereld. In de stad woene väöl extreem rieke expats, zoewie groete gróppe gojekoupe arbeiers (dèks oet Zuid-Azië). De arsjitectuur trèk allewijl ouch väöl toeriste nao de stad, al blieve de minserechtesituatie en de streng islamitische regele veur väöl westerse lui e probleem.


  Dit artikel is e sjtumpke. De kans Wikipedia helpe door 't aan te völle

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Dubai_(stad)&oldid=447981"