De Plasmeule
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Mokers, es te dit dialek sjpriks.
De Plasmeule (Nederlands: Plasmolen) is e klei dörp in de Nederlands-Limburgse gemeinte Mook en Middelar, t'n ooste vaan Mook, aon de Mokerplas. Op 1 januari 2005 had 't 326 inwoeners. 't Dörp ligk op 11 meter huugde, mer 't gief vrij groete huugdeversjèlle in 't gebeed door de kortbijheid vaan de Mokerhei, d'n oetluiper vaan de Nederriensen Heuvelrögk. 'ne Markanten top is hei de Sint-Jansberg, dee 75 meter hoeg is. Langs De Plasmeule löp 't Pieterpaad en 't noordelekste netuurgebeed in beheer vaan 't Limburgs Landsjap is "De Molenberg", e loufböske mèt e oppervlak vaan 0,77 ha. Op de Mokerhei ligke ouch fóndeminte vaan 'n Romeinse villa, die vermeudelek geboewd woort in d'n twieden iew nao Christus.
't Dörp stoont in de ierste haaf vaan d'n twintigsten iew bekind es kunsteneerskolonie, toen twiehoonderd kunsteneers vaan de stichting Jacques Mourik ziech hei vestegde. Zoeget es de "Plasmeulese Sjoel" goof 't neet, alhoewel de kunsteneers ziech lete inspirere door 't netuursjoen vaan de umgeving. Neve Van Mourik waore Dirk Ocker, Gerard Cox sr., Julius Brouwers, Leo Niehorster, Theo Deckers en Jopie van Kampen aander bekinde naome. Allewijl gief 't in de gemeinte Mook nog ummertouw tientalle professionele kunsteneers.
Doortot 't dörpke tösse de Mokerplas en de Mokerhei ligk, is toerisme 'n rilletief belaankrieke brón vaan inkomste. Aon de rieksweeg (de N271) dee door 't dörp löp ligke versjèllende etablissemente en campings.
Gebore bewirk
- Julia van Verschuer (1926-2016), beeldhouwster
- Gunnar Daan (1939-2016), arsjitek en beeldend kunsteneer
Externe link bewirk
| |
|---|---|
| Dörper en gehuchte: De Meulenhoek · Middelar · Mook · De Plasmeule | |
| Buurtsjap: De Bieselt | |