Benedict Anderson

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Benedict Richard O'Gorman Anderson, meistes bekind es Benedict Anderson (26 augustus 1936, Kunming te Yunnan, China - 13 december 2015, Batu te Oos-Java, Indonesië) waor 'ne Chinees-Brits-Ierse polletieke weitesjapper en historicus dee veur 't groetse gedeilte vaan zie leve heet geleef en lesgegeve in de Vereinegde Staote. Anderson is 't meis bekind door zie book Imagined Communities oet 1983, boe-in heer de orizjien vaan 't nationalisme bestudeerd. Wijers waor heer gespecialiseerd in de polletiek vaan Zuidoos-Azië en sprook heer 'n hendeg hoeg aontal taole oet dee regio, boe-oonder Indonesisch, Javanees, Thai en Tagalog. Daoneve sprook heer ouch väöl Indo-Europese taole, wie 't Frans en Duits.

Anderson besjreef in Imagined Communities wat nationalisme percies meint en welke faktore d'r veur hadde geholpe tot 't nationalisme binne drei iewer tied (vaan de laten 18e iew bis allewijl) neet allein 'n dominante polletieke ideologie zou weure, mer in prinsiep de meis universalistisch geaccepteerde ideologie. Anderson diffinieerde 'n natie es 'n "geïmagineerde polletieke gemeinsjap die geïmagineerd is as zoewel inherent gelimiteerd wie soverein". "Geïmagineerd" meint op force vaan häöm evels neet tot 't neet besteit. De mins is in Andersons wäörd bekwaom um zelf-bedachte konsepte um te zètte in get wat materieel tasbaar kin weure (bezej weurt realiteit).

Wat nationalisme zoe interessant maak op force vaan Anderson is neet allein zoe dominant is in de allewijl wereld, mer tot 't eigelek gaaroet gein bekinde filosofe achter ziech heet stoon. 't Liberalisme en Marxisme höbbe de force vaan 't nationalisme oondersjat volges Anderson. 't Gief op force vaan Anderson drei paradoxe roontelum 't nationalisme:

  1. 't Nationalisme is 'n nui en modern creatie, wijl naties zjus weure geïmagineerd es aajd en tiedloes in de aoge vaan de meiste lui (beveurbeeld: Nederlandse nationaliste stèlle tot de Nederlandse cultuur al iewe aajd is, wijl de mierderheid vaan de Nederlandse Limbörgers bis de vreugen Twintegsten Iew nog gaaroet gein Nederlands koste spreke)
  2. 't Nationalisme is universalistisch door 't feit tot eder individu op d'n eerd allewijl bij 'n bepaolde natie huurt, mer tegeliekrtied is eder natie gans en al aofgesjeie vaan de aander natie (beveurbeeld: alle Limbörgstaolege valle binne 'n bepaolde natie allewijl - de Belzje, Duitse of Nederlandse naties. Mer me maag es börger mèt Nederlandse nationaliteit neet daoneve 'n Belsj paspoort höbbe)
  3. Nationalisme is 'n idee wat zoe väöl invlooj heet tot 't väöl lui gief die klaor stoon um te hiemele veur hun naties, wijl 't idee vaan 'n natie tegeliekertied neet klaor is (beveurbeeld: 't Is neet klaor boe de Nederlandse staot es ideaal veursteit boe de Belzje of Duitse staote neet veur stoon; toch zal 'ne Nederlandse soldaot in prinsiep bereid motte zien um te hiemele veur de Nederlandse natie en maag heer daoneve überhaup veur gein aander ideaol hiemele - zoewie 'n aander polletieke ideologie, 'n aander natie of 'n relizjie)
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Benedict_Anderson&oldid=450557"