Arthur Honegger
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
| Arthur Honegger | |||
| |||
| Gebore | 10 mièrt 1892 | ||
| Gesjtorve | 27 november 1955 | ||
| Landj | Zjwitserland, Frankriek | ||
| Sjtielperiood | neoclassicisme | ||
| Belankrieke genres | orkesmeziek (symfonie, concert en anger werke) | ||
| Invlood van | Johann Sebastian Bach, Max Reger, Claude Debussy, Igor Stravinski, Darius Milhaud | ||
| Invlood op | Olivier Messiaen | ||
| Lies van componiste | |||
Arthur Honegger (10 mièrt 1892 - 27 november 1955) waor 'ne Zjwitserse componis. Soms weurt hae miè geassocieerd mèt Frankriek, meh hae bleef zie gans leve Zjwitsers sjtaatsburger. Honegger sjreef ongevaer 200 sjtökker. Zien bekèndste sjtök ies waarsjienlik waal Pacific 321 oet 1923. In dit sjtök weurt door 't orkes 't geluid van 'ne sjtoumlocomotief naogedoon.
Leve bewirk
Arthur Oscar Honegger woort gebore in Le Havre. Zien ouwersj waore van Zjwitserse aafkoms. Ziene pap waor importeur van koffie. Honegger lièrde al vreug vioal sjpele en hae begoes al jónk te componere. In 1909 begoes 'r mèt ein sjtudie vioal en muziektheorie aan 't conservatorium in Zürich. In 1911 góng hae weer truuk nao Frankriek um wiejer te sjtudere in Paries, bie onder andere Charles Widor en Vincent d'Indy. In 1918 waor hae klaor mèt zien sjtudie en sjreef 'r 't ballet Le dit des jeux du monde, dat besjouwd weurt es zien ièrsjte karakteristieke compositie. Wie 'r 28 waor woort Honegger waereldberoemp mèt 't oratorium Le Roi David.
In de periode tösje de waereldoorloge waor Honegger hièl productief; hae sjreef onder andere neuge ballette en drie opera's. De opera Jeanne d'Arc au bûcher oet 1935 weurt gezeen es ein van zien bèste werke.
Honegger haet ziech altied verbonge geveuld mèt Zjwitserland, meh wie de Twiède Waereldoorlog oetbraok en de Nazi's Frankriek binnevele, koes hae neet weg oet Paries. Hae góng door mèt componere, meh me dènk dat 'r erg depressief raakde door de oorlog. Hae sjreef èvvel tösje 1940 en ziene doad in 1955 nog ènkel symfonieë (nummer 2 t/m 5), die nog vrie dèks were gesjpeeld.
Arthur Honegger sjtorf op 27 november 1955 en woort begrave op 't Cimetière Saint-Vincent in Montmartre in Paries.
Groupe des Six bewirk
Hoewaal Honegger lid waor van de Groupe des Six, zint zien werke neet zoa sjpeels en sumpel van karakter es die van de ander lede van deze groep. Honegger waor ouch neet tege 't romanticisme van Richard Wagner en Richard Strauss, meh de ander groepslede waal. Op latere laeftied woort hae zelfs beïnvloed door 't werk van Wagner en Strauss.
De andere leje van Les Six waore:
- Georges Auric - (1899-1983)
- Louis Durey - (1888-1979)
- Darius Milhaud - (1892-1974)
- Francis Poulenc - (1899-1963)
- Germaine Tailleferre - (1892-1983) (de enige vrouw in de groep)