Spinaasj

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Spinaasj of spinaad (Spinacia oleracea) is 'n plantj oete amarantefemielje (Amaranthaceae) die verwantj is aan plantje wie ganzevoot en melde. 't Is 'n snel-greujendje, einjäörige blaadgruuendje, die al vreug in 't veurjaar besjikbaar is. 't Is 'n aaj gruuendje die veur 't ieës in Perzië woort geteeldj.

't Waord "spinaasj" is aafkómstig van 't Perzisch waor اسفناج 'Esfenaj'. Spinaasj greudj euvere ganse werreld mit oetzunjering vanne troeapische gebiede. Trótsdet spinaasj al ieëve wuuertj geteeldj in Sjina, bereikdje de plantj Europa pas inne twellefdjen ieëf mitte kóms vanne Moearen in Spanje. Inne zèstieëndjen ieëf waas spinaasj nag 'n nujigheid in Italië, meh waal al ingebörgerdj in Ingelandj. 't Ieëste gebroek bleef bepirk toet laxeermiddel. 't Laxeereffèk kump door 't hoeag oxaalzoergehaldje.