Sjlovene

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Sjlovene (Sjloveens: Slovenci; Duutsj, veraoderd: Windische, Alpenslawen) vörme e Zuud-Slavisch volk wat inheems is i Sjlovenië, in dele van d'r Uuesteriekse deelsjtaat Karinthië, i g'ne Itteljenisje deelsjtaat Friulië en in 't zuudweste van Hongarieë. Zie kalle Sjloveens, 'n Zuud-Slavische taal die verwant is aan 't Servo-Kroatisch. De mieëtste Sjlovene zint katholiek. I g'ne regio Prekmurje, teëge de grens mit Hongarië, gieëf 't 'n lutheraanse minderheed. In Sjlovenië make ze zó'n 83% van de bevolking oet.

Weltwied gieëf 't zó'n 2,5 miljoeën Sjlovene, oeëvan 1,7 miljoeën in Sjlovenië, 175.000 bis 300.000 in de VS, 80.000 bis 100.000 in Italië (vuural i Friulië), 50.000 in Uuesteriek (vuural i Karinthië) en 50.000 in Duutsjland. De Sjloveense diaspora in Nederland en 't Belsj is kling, meh ieëwenaod: 't geet um óngevier 1000 luuj i Nederland en 4000 luuj in 't Belsj. De mieëtste luuj va Sjloveense komaaf woeëne i g'n Parksjtad en rónk Genk en Luuk. Hun vuurouwesj werkde in de koele en de sjtoalindustrie. De ieësjte Sjlovene koame in d'r 15e ieëw en nome deel aa beëvaarte noa Kölle, Oake en Mesjtreech. Zie verierde ónger mieë d'r hl. Servaas.