Siêbegewâld
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Siêbegewâlds, es te dit dialek sjpriks.
Siêbegewâld (Nederlands: Siebengewald) is e dörp in de Nederlands-Limburgse gemeinte Baerge, aon de Duitse grens, mèt (2016) 2.020 inwoeners.[1] 't Dörp heet 'n oetgebreid vereinegingsleve. Zjus euver de grens ligk 't Augustienekloester Gaasdonk.
De naom Siebe(n)gewald is aanders es 't liek neet vaan Hoegduitsen oorsproonk, en me moot de naom oetspreke volges de Nederlandse regele. De aajdste vermelding stamp oet 1326; de plaots hèt daan Sevenghewaet. Siêbegewâld is laank mer 'n naobersjap in de hierlekheid Offere (Afferden), sinds 1800 vaan de gemeinte Baerge, gewees. In de negentiende iew woort de heigroond evels bebouwd en greujde de plaots oet tot 'n ech dörp: in 1841 woort hei e sjäölke gestiech en in 1870 kaom de dörpskèrk veerdeg. 't Aontal inwoeners greujde de ganse negentiende en twintegste iew door: in 1840 had de plaots 293 inwoeners, in 1870 al 566. In deen tied woorte 'n aontal nui naobersjappe gestiech. De Hei, wat pas in de twintegste iew oontstoon is, is dao de jóngste vaan.
De grens mèt Duitsland weurt gedeiltelek gevörmp door de Kendel, e zijrevierke vaan de Niers det zjus wie de Niers hiel sterk meandert. Veurnaomelek op 't Duits groondgebeed ligke hei 'n aontal brookbosse.
Externe link bewirk
Brón bewirk
| |
|---|---|
| Dörper en gehuchte: Baerge · Ald-Berge · Äöje · De Loj · Ni-j-Berge · Offere · Siêbegewâld · Wel | |