Sintervaos
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Sintervaos (ouch Servaos, Faos; Latien Servatius; gestorve 384?) is 'ne katholieke heilege dee leefde in de veerde iew. Heer is de petroenheilege vaan de stei Mestreech en Grimberge, en vaan de sleutelmekers en sjrienwèrkers. Zie leve is sterk door legendes verteikend.
De legende vertèlt tot heer gebore zouw zien in Armenië oet Joedse awwers. Waorsjijnlik evels waor 't iemes oet de Toxandrische landadel. Roond 't jaor 340 zal heer bisjop gewore zien vaan Tóngere. In 343 duuk heer op op de Synood vaan Sardica en in 359 weer op de Synood vaan Rimini, woe heer es ein vaan de mètstanders vaan 't athanasisme 't arianisme aonvèlt.
Vaan 't werk in zien eige bisdóm is weineg bekind; heer heet in eder geval de zetel vaan Tóngere nao Mestreech verplaots, ofwel um de kèrksjatte te kinne verdeidege, ofwel umtot me in Tóngere neet kós leve mèt zien strikte lezing vaan 't christendóm. Heer zouw gestorve zien in 384. Heer woort al snel nao zienen doed heileg verklaord; ziene fiesdaag is 13 mei en daomèt is 'r eine vaan de Iesheilege. In of roond 560 woort in Mestreech de Sintervaoskèrk gestiech, de veurluiper vaan de huiege basiliek.
Behave dees aonnummeleke feite zien vaan Sintervaos veural väöl legendes bekind. Zoe zouw heer örges nog familie vaan Zjezus zien (zien euverama Ismeria zouw 't zöster zien gewees vaan Sinte-Anna), en zouw Sint-Pieter häöm op 'n reis nao Roeme zien versjene en häöm zien zèlvere sleutel gegeve höbbe. Zie heilegeleve woort opgeteikend in de Gesta Sancti Servatii, en in de twelfde iew door Heinric van Veldeke nao de volkstaol bewèrk (zuug ouch Limburgs).