Saint-Denis
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Saint-Denis is 'n stad in Fraankriek, regio Île-de-France, departemint Seine-Saint-Denis, mèt in 2013 109.343 inwoeners. De stad ligk e paar kilometers noordelek vaan Paries, boe 't 'n echte veurstad (banlieue) vaan is, aon 'nen drej in de Seine. Nao Paries zelf en Boulogne-Billancourt is 't de daarde stad vaan de regio.
Saint-Denis zouw in d'n daarden iew zien gestiech door d'n H. Dyonisius dee ziech um aon christenvervolginge te oontkoume in de buurt vaan Lutetia (Paries) vèstegde. Nao häöm is de stad geneump. Sinds zien stiechting bleujde 't ummer in de sjeem vaan Paries. Door zien ligking aon de weeg nao 't noorde woort 't 'n belaankrieke handelsplaots. De kèrk vaan Saint-Denis waor ouch de plaots boe ziech de Frankische keuninge, en later de Franse lete kroene en begraove. Tösse 1793 en 1800 hètde de stad Franciade, umtot de naom vaan 'nen heilege neet acceptabel waor veur 't nui regime. Napoleon evels bepaolde in 1806 tot ouch heer en zien opvolgers dao móste weure begrave. In de negentienden iew raakde de plaots zwoer geïndustrialiseerd en greujde ze vas in de stadsbebouwing vaan Paries. In dezen tied verlinksde de stad ouch zier, e perces wat in de jaore 1930 zelfs zouw veure tot de verkezing vaan communistische börgemeisters. Nao d'n Twiede Wereldoorlog kraog de stad 'n multicultureel bevolking, die gooddeils in genegligeerde krottewieke kaom te woene. Dit lieverde de stad gein gooj reputatie op.
Twie gebouwe bepaolde 't aonzien vaan de stad. 't Ierste is de kathedraol vaan Saint-Denis. Neet allein is dit de plaots boe me, wie gezag, de Franse keuninge kroende en begroof, ouch woort 't huieg kèrkgebouw, wat oet d'n twelfden en daartienden iew stamp, gezeen es d'n ierste gotische kèrk op de wereld. Allewijl steit de stad ouch bekind um 't voetbal- en rugbystadion Stade de France, 't groetste vaan Fraankriek. Dit stadion is speciaol gebouwd veur 't WK voetbal vaan 1998 en geit ouch gebruuk weure op 't EK voetbal vaan 2016.
Dit artikel is e sjtumpke. De kans Wikipedia helpe door 't aan te völle