Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Embleem vaan STS-135

STS-135 (voloet Space Transportation System 135) waor de allerlèste vlöch oet 't Space Shuttle-program. De lancering voont plaots op 8 juli 2011 um 11:26:46 plaotseleken tied (17:26:46 Nederlandsen tied). De missie waor gepland veur d'n doer vaan 12 daog, en heet veurnaomelek extra oonderdeile nao 't ISS gebrach. Tijdens de missie is deze oetgebreid mèt einen daag. De Space Shuttle Atlantis veel de ier touw dees lèste missie oet te voere. De Atlantis waor in feite al klaor, umtot deze Space Shuttle klaor stoond es de zoegenaomde Launch On Need (LON)-missie STS-335. Bij LON-missies steit 'ne Space Shuttle (bijnao) klaor veur 't geval de zjus gelanceerde Space Shuttle neet mie kin trökkiere nao Eerd, beveurbeeld umtot dee versjendeleerd is bij de lancering (zoewie bij de ramp mèt de Columbia. De LON-missie kin daan de astronaute vaan de gestrande missie ophole. De landing voont plaots op 21 juli 2011 um 5:57 plaotseleken tied (11:57 Nederlandsen tied).

Umtot bij dees vlöch geinen aandere Space Shuttle klaor kós stoon, bestoont de bemanning oet slechs 4 astronaute: commandant Christopher Ferguson, piloot Douglas Hurley, en de missie-specialiste Sandra Magnus en Rex Walheim. De klein bemanning zörgde deveur tot de maximale vrach kós weure mètgenome, en tot in geval vaan noed 'n Russisch Sojoez-ruimtevaartuig kós weure gebruuk um de bemanning op te hole. 't Trökhole vaan de astronaute zouw evels in dat geval e jaor in beslaag numme, umtot zie ein veur ein zouwe weure trökgehaold.

Vrach bewirk

De Multi-Purpose Logistics Module (MPLM) Raffaello waor gevöld mèt 16 beveurraodingsrèkke, 't maximum wat drin pas. Daoneve góng de Lightweight Multi-Purpose Carrier mèt, dee gebruuk woort om 'n kepotte ammoniapoomp mèt trök te numme, zoetot die op de groond geanalyseerd kin weure. Weier heet de Robotic Refuelling Mission (RMM) mètgevloge. Dit is 'n missie um te teste of 't meugelek is um satelliete in de ruimte vaan brandstof te veurzien.

De allerlèste satelliet dee oet 'ne Space Shutlle zouw weure gelanceerd waor de Pico-Satellite Solar Cell Testbed 2. Dit is 'ne miniatuur satelliet (3,7 kg), mèt 'n paar experiminte vaan d'n Amerikaanse Lochmach.

Es lèste naom de Atlantis de TriDAR mèt nao bove. 't Waor de daarde vlöch vaan dit instrumint (ieder vloog 't mèt STS-128 en STS-131), wat gebruuk kin weure veur geleiding bij otomatisch koppele of lande op 'n planeet.

Landing bewirk

De landing voont plaots op 21 julie 2011 um 5:57:00 plaotseleken tied (11:57:00 Nederlandsen tied). Atlantis stoont stèl um 5:57:54, wat es 'n historisch momint weurt gezeen. Nao mie es 30 jaor stopden 't Space Shuttle tiedperk.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=STS-135&oldid=409805"