Eikets
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
d'n Eikets, roeajen eikets of gewuuenen eikets (Sciurus vulgaris) is de in Europa meis-veurkómmendjen eikets.
d'n Eikets is 18 toet 24 centimaeter lang en 250 toet 350 gram zwaor. De bustelige ploemstert is van 14 toet 20 centimaeter lang. 't Is 'nen omnivoor, dae toete knaagdere behuuertj.
d'n Eikets voortj zich mit naam mit plantjaerdig matterjaal, wie nuuet en zäöj van sparren- en dennebuim. Wiejer vraete ze knuup, paddesteul, stökker boumsjors en sómtieds deerlik matterjaal, wie insekte, eier en zelfs jóng veugel. Ouch vraete ze aerd veur minerale binne te kriege. d'n Eikets vrètj daacheliks vief percent van zie liefgewich aan voor. Juus wie väöl anger knaagdere lègke eiketse wintjerveurräöj aan.
Anges es de naam duitj vermeuje kan de kluuer variëre van zwart toet gelvig, mit alderlei kluuere roead en broen daotösse. Melanisme kump veur, meh de maot worin individue melanistisch zeen versjiltj zich per regio. Normaal gespraoke zeen de dere roeadbroen mit 'ne witte boek; 's wintjers zeen ze grieziger dónkerbroen. De kluuer wuuertj ouch griesechtiger naomaot d'n eikets ajer wuuertj. d'n Oearploeme valle veural inne wintjer op. 'nen Eikets kan de haor oppe ploemstert opzètte.