Rukkelinge-aan-de-Jeker

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De Sint-Remigiuskèrk.

Rukkelinge-aan-de-Jeker (in 't Waals Roclindje-so-Djer, in 't Frans: Roclenge-sur-Geer) ies e dörp in de deilgemeinte Bitsinge (Bassenge) op 't Belsj. Tot 1963 behuèrden 't bie Belsj Limburg. Nao 't vassjtèlle van de taalgrens in Belsj kaom 't in de provincie Luuk (Wallonië) te liegke. 't Ies gelege aan de rivier de Jeker die hie Geer weurt geneump.

Bezeenswaerdig

• Op 't centraal plein sjteit 'n ouw kiosk en 'n oorlogsmonument. Op 't in klassieke sjtiel opgetrokke gemeintehoes van baksjtein hingk e bord mèt de vermelding: “Bassindje, province de Lîdje” (Luuk) in 't Waals. In de veurgevel sjtoon rón zule mèt ionische kapitele. In de miedde 'n balkon en daobove 'ne tympaan.
• De baksjteine kèrk, mèt 'ne sjpietse tore, ies verseerd mèt mergele hookblök en lieste rónd de rón zievènstere. 't Geboew ies gelege op 't kèrkhof. Daoneve bevingk ziech 'n klein Lourdesgrötsje mèt beelde van Maria en Bernadette.
• In de buurt, in Bitsinge liek in e wandelpark 't baevaartsoord "Klein Lourdes" (Petit Lourde) mèt 'n Lourdesgrot, de 14 kruusweegsjtasies, 'ne roazekransróndgank mèt de 14 kapelle woa-in de zeve zalighede en de zeve sjmarte van Maria zin oetgebeeld, oet 1895. Ouch bevingk ziech hie 'n kloaster. Saer 2007 sjteit d'r 'n nuuj kapel.
• Haol waeg in 't heuvellandsjap rónd de rivier de Geer
• Mergelgrotte woa mergelsjtein woorte gehaold en sjampeljóngs were geteeld
• De Romeinse weeg, de Via Jecore, 'ne zietak van de Via Belgica, löp hie gedeiltelik euver 'n fietspaad.