Piespötteke

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Piespötteke of pispötteke (Nederlands: Haagwinde), Covolvulvus sepium of Calystegia sepium, oet de familie Convolvulaceae, ies 'n vaste plant met 'n groate wiete bloom. Zie ies in Nederland de groatste inheemse bloom. Vanwege zien sjlingerende en rankende sjtengel weurt de plant ouch Rierank geneumd. Rierank wies ouch nao 2 ander volksname: Rierank (Heggerank) en Rieraank (Bosrank). Vanwege 't väöl veurkómme op allerlei óngewunsjde plaatse weurt 't piespötteke waal es 'n ónkroed bejouwd.

Kènmerke

Lange dunne, riejende, rechsum wingende sjtengel, dae riechting zón greujt. Drièjt ziech um ander plante, in en door hègke en aafrasteringe. De lengde geit tot óngevaer 2-3 maeter. Ónder de grónd bevingk ziech 'ne wortelsjtek, woavanoet talrieke sjeut nao bove sjete.

Bleuj

Van juni tot in de herfs bleujt 't piespötteke mèt 'n groate (5-7 cm) wiete (pies)potvörmige bloom. De bloom bleujt mer eine daag, sjluut ziech es 't duuster weurt of es 't regent. De doasvröch haet 1-4 zäödsjes.