Recensie

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

'n Recensie (Latien recensio: käöring) is 'n vurm van secondaire literatuur. 't Is 'n kritische besjpraeëking van 'n cultureel uting, wie e leedsje, 'n book, 'ne film, 'n toneelväörsjtèlling of 'n muziek-oetveuring.

Mètstens wert 'n recensie gepubliceerd in 'n gezèt, 'n tiedsjrif of op 't internet. D'r perzoeën dae 'n recensie makt neumt me 'ne recensaent. 't Is gebrukelek dat 'n cultureel uting dör mieërdere recensaente wert besjpraoëke en mètstens kalle ze zich oonderèè taege. 't Gratis exemplaar van 'n book, 'n CD, 'ne DVD of 'n toegangskaart neumt me 't recensie-exemplaar.

Kenmaerke van 'n recensie

'n Recensie bevat op z'n minst 'n, leefs mèt argumaente oonderboewd, waerdoordeel. 't Besjpraoëkene wert in 'ne rume context geplaatsjt en 'ne korte inhoud wert gegaeve. Soms werre d'r sjterre of, zoewie in Limburg op L1 peunte en chapeau's oetgedeeld, zoedat me 'n good uvverzich kriet uvver de beoordeelde waerke.

Kenmaerke van 'ne recensaent

Bie 'n recensie gèèt 't naeve objectieve criteria die gehanteerd werre ooch altied um 'n subjectief oordeel van d'r recensaent. Daovör is naeve 'n gedege kennis van zake en vakkennis ooch zoeget oondefinieerbaars wie ethisch besef, gewete en verantwoordelekheedsgeveul noodzakelek. In 't ideale geval hèlt d'r recensaent van 't object dat e beoordeelt; is e hoeëgopgeleid en tut vergelieke in sjtaot; kènt alle actore en zakes van 't gebied of thema, neet allèng va noe, mae ooch van 't verlaeje um zoeë trents väöroet te kènne zieë.

D'r invloed van recensies

Es opiniemakers kènne recensaente invloed ha, mae uvver de mate va invloed van 'n recensie is me oonerèè verdeeld. Recensies werre vöral gretig gelaeze zoedat ooch 'n negatief recensie 'n waerk in de publicitèèt brèngt. Uvver 't algemèng gèèt me d'r van oet dat 't baeëter is um 'n sjlechte recensie te kriege dan gèng.

Bekaande Limburgse recensaente

Colla Bemelmans - Limburgstalège keunste
Peter Winkels- literatuur
Jan Salden- film
Ger Bertholet -toneel
Tom Doesborg - toneel, beeldende keunste
Lucia Geurts - toneel
Jos Prop - toneel
Paul Weelen - toneel
Herman Poels- muziek
Ine Sijben - toneel
Harry Vorselen - muziek
Ruud Lammerink - beeldende keunste