Razzia

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

'n Razzia (oet 't Arabisch: ḡāziya, غزوة) is 'n durch de uëverheed georganiseerde en groeëtsjalige opgezatte opsjporing van 'ne groep lüj. In Nederland en óp 't Belsj raakde 't begrip ingeburgerd es gevolg va g'ne Holocaus en de bezetting durch Nazi-Dütsjland tussje 1940 en 1945. 't Woad hat doadurch 'n negatief connotatie en weëd zelde gebroek went me sjprik uëver vervolging van lüj die weëde verdach van sjtroafbaar feite, tenzie me beivuurbild de rechmieësigheed van 'n arrestatie in twiefel trek. In Dütsjland en Zjwitserland weëd 't soms gebroek es synoniem vuur Haussuchung of Polizeieinsatz. Razzia's weëde mieëtstes neet aangekóndig.

I vöal Oeës- en Centraal-Europese leng huurde razzia's bei 't dageliks leëve wie de nationaalsocialiste doa binnevele en hun Lebensraumplane ten oetveur wole bringe. De good georganiseerde arrestaties markeerde 't begin va g'ne Holocaus, woeëbei mieljoeëne lüj woeëde gedeporteerd, noa getto's woeëde gesjik en sjpieëder noa concentratie- en vernetigingskampe. I Nederland vónge versjillende razzia's plaatsj en die woare mieëtstes gerich óp Jüdde i g'n Randsjtad of manslüj die vervolges tewirk woeëde gesjteld i g'n Dütsje kreegsindustrie. Soms goof 't vergeldingsacties. Óp d'r 2e oktober 1944 woeëd Putten, e dörp óp g'n Veluwe, ópgesjrik durch 'n razzia durch d'r Dütsje bezetter: doe woeëde bauw alle manslüj (659) aafgeveurd noa versjillende concentratiekampe en de mieëtste hant dit neet uëverleef. I Limburg woare razzia's dök neet zoeë good georganiseerd es boave de reviere en vuural in 't noarde va g'n provincie óntsjtóng e groeët óngerdukesjnetwerk.

In 1944 vónge i Noard-Limburg en in Helenaveen (Noard-Brabant) de kirkrazzia's plaatsj. Zo'n 2800 manslüj woeëde tewirkgesjteld bei de Hermann-Göring-Werke. De mieëtste uëverleefde d'r kreeg. Dat gool evvel neet vuur 121 arrestante.

Razzia

Extern linke bewirk