Vlaot (plantj)
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Vlaot (Ranunculus fluitans) is 'n vaste plantj die vèltj ónger bótterblomen en behuuertj toete ranonkelfemielje (Ranunculaceae). Vlaot is 'n plantj die greutj in snelstruimendj, aetesriek water. De plantj kump in Nederlandj veur in Naord-Braobantj en Zuud-Limbörg. Ze is zeldjzaam en sterk aafgenómmen in aantaal.
De plantj wuuertj 0,90 toet 6 m lang en is good aangepas aan wusjelendje waterhuuegdjes. Bie oetdruueging kan de plantj euvergaon in 'ne vorm dae op 't landj kan euverlaeve. De óngergedaoke blajer zeen sterk gedeildj en aeve lank of langer es de tösseknoupstökker. Drievendje blajer óntbraeken of waere hieël aventoe meh gevörmp.
Vlaot bleutj van junie toet augustus en haet witte blome. De blome höbbe meistes zès kroeanblajer, wovan de nagel gael is. 't Aantaal kan aevel wusjele tösse de vief enne tieën. De bleujbaom is kaal of min behaordj.
De dwaersjgerumpeldje doepvröchte zeen inne begin nag min behaordj, meh wen ze riep zeen, zeen ze meistes kaal.