Provinciale waeg 278

Dit artikel is gesjreve in 't Heëlesj. Ómdat 't plaatsgebónge is, maogs doe 't ómzètte nao 't Gulpesj, es te dit dialek sjpriks.

---

D'r provinciale weëg 278 is 'n verkiersweëg mit 'n lingde va ruum 30 kilomeëter in 't zude van de Nederlandse provincie Limburg, deë Mesjtreech, via Gulpe en Vols mit de Duutsje sjtad Oake verbingk. Va wes noa oeës lupt d'r weëg durch de plaatsje Mesjtreech, Hier, Keer, Mergroate, Gulpe, Wilder, Nieswieler, Lemieësj en Vols.

D'r N278 bei Wilder

Gesjichde

't Tracé van d'r N278 lupt parallel aan en gediltelig same mit dat van d'r Aode Oakerweëg, 'n heërbaan oet d'r Romeinse tied. Dizze weëg woeëd waarsjienlig al vuur't ing van 't Ancien Régime vervange durch 'ne beëtere en langere weëg via Valkeberg en Heële en in 1779 verhad. In 1823 begós d'r aalek van d'r nuie rieksweëg tussje Margroate en Gulpe. Tussje 1826 en 1828 vóng de besjtroating plaatsj.

Vuurdat get noardeliger de A79 woeëd aangelag, woar d'r weëg gepland es A78. 't Autobaantracé zou óngevier 'tzelfde trajek es d'r N278 volge. Dit projek hat evvel ginne durchgank gevónge. Ópmerkelig is 't vuurmalige klieëblaadknooppunt Europaplein, aagezieë knooppunte mieëtstes vuurkómme óp plaatsje oeë 'ne sjnelweëg inne angere sjnelweëg of 'ne autoweëg krütst. In 't kader van d'r boew van d'r Kuëning Willem-Alexandertunnel, deë óp 16 december 2016 woeëd geöapend, is dit knooppunt umgeboewd gewoare.

Besjrieving

D'r N278 is inne van de wieënige N-weëg i Nederlank deë tussje twieë lanksgrenze lupt. Heë begint aa g'n grens mit 't Belsj, aa g'n wesgrens va Mesjtreech. Aa g'ne Belsje kank geet d'r N79 wieër noa Tóngere. D'r N278 is hei 'ne sjtadsweëg durch 't zude va Mesjtreech. Hei uëversjpant de Kennedybruk de Maas, oeënoa 't ouw Europaplein volg, de aasjleting mit de A2 noa Luuk en Eindhove. Oeësteliger lupt d'r N278 durch 't oeëste van de sjtad en vervolges durch versjillende dörper in 't Zuud-Limburgse huëvellank. Bei Mergroate lupt d'r weëg langs d'r Amerikaanse kirkhof en ten oeëste van dat dörp kin me via d'r N598 aafsjloa noa Norbik en Aubel. Óch kint d'r weëg 'n aantal klumsjtroake bei De Hut, tussje Gulpe en 't Plateau va Mergroate. Bei Nieswieler indig d'r N281, oeënoa d'r N278 parallel aa g'n grens mit Dütsjlank noa Vols lupt. D'r weëg geet vervolges durch 't dörpscentrum, oeënoa aa Dütsje zie de B1 wieër durch Oake geet.

Trajekuëverzich

	punt in trajek	aasjleting
		N79
	Mesjtreech-Campagne
	Mesjtreech-Biesland
	Mesjtreech-Mariaberg
	Mesjtreech-Tóngerseplein
	Mesjtreech-Villapark
	Mesjtreech-Maasboulevard
	John F. Kennedybruk	Maas
	Mesjtreech-Limburglaan
	Aasjleting Mesjtreech-Centrum Zuud	A2/N2
	Mesjtreech-Sjaan
	Mesjtreech-Hier
	Mesjtreech-Hier-Oeës
	Keer
	Mergroate
	N598
	N595 / Partei
	Wilder
	Nieswieler
	N281
	Lemieësj
	Vols
		B1

Fotogalerie

• 
  John F. Kennedybruk
• 
  Bei Keer
• 
  Bei Wittem
• 
  De grensuëvergang bei Vols

't Bezieë weëd

Langs d'r weëg ligke 'n aantal rieksmónnemente oeë-ónger kesjtieële, kirke, kloeëstere en mónnementaal höaf. E bezónger mónnement is d'r kirkhof i Mergroate. Officieel heesj e Netherlands American Cemetery and Memorial.

• 
  D'r kirkhof va Mergroate
• 
  Kesjtieël Neubourg
• 
  Abdij va Mamelis
• 
  Sint-Catharina en Luciakirk i Lemieësj