Protosjrif

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Tablèt mèt Vinčateikes oet Roemenië.

't Kisjtablèt tuint de vreugste veurluiper vaan 't nagelsjrif.

't Rongorongo vaan Paoseiland waor allezeleve ouch protosjrif.

Protosjrif is 't gebruuk vaan teikes op 'n sjrifechtege meneer, zoonder tot mèt die teikes evels taol weurt weergegeve. De teikes höbbe dus al mie abstractie es 'n sumpel sjèldering vaan 'tginnege wat ze veurstèlle, meh höbbe nog neet de maot vaan abstractie die ech sjrif heet.

Protosjrif weurt geach veuraof te goon aon eder ech sjrif wat ziech in de loup vaan de iewe zelfstandeg oontwikkeld heet. 't nagelsjrif en de Egyptische hiërogliefe begóste aontuinbaar es protosjrif, en vaan de Chinese karakters maag me 'tzelfde aonnumme. In väöl gevalle heet ziech e protosjrif oontwikkeld zoonder tot dao 'n ech sjrif oet veurtkaom. Dit waor oonder mie 't geval bij de Vinčasymbole oet de Balkan en Midde-Europa, de Jiahusymbole oet China, 't sjrif vaan de Indusbesjaving, 't Nsibidi oet Nigeria en, volgens de mieste wetensjappers, ouch 't Rongorongo vaan Paoseiland.

Wijer heet me in de grotte vaan Lascaux, tösse de teikeninge vaan bieste op de mör, symbole gevoonde die me heet wèlle leze es 'ne maonkelender. Dat zouw beteikene tot zelfs de Paleolithische jegers-verzamelere dit niveau vaan abstractie hadde.