Pevek

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

Pevek, op de veurgrónd hoeëgbouw en op d'n achtergrónd de have en de Oeës-Siberische Zieë

---

Pevek (Rössisch: Певе́к; Tsjoektsjisch: Пээкин / Пээк) is 'n havestad in 't autonome distrik Tsjoekotka, de noordoeëstelikste regio van Rösland. Pevek is ouk ein van de noordelikste staej van det land. De stad besteit oet 'n aantal woeënblokke en vaerder domineert de zieëhave 't stadsbeeld. Pevek haet óngevier 5.000 inwoeëners. In 1989, vlaak veur de val van de Sovjet-Unie, ware det mier es 12.000.

Pevek leet in 't oorspronkelike laefgebeed van de Tsjoektsje, 'n Paleosiberisch volk in 't noordoeëste van Siberië.

De ierste bewoeëners kwame heej kórt nao d'n Ierste Waereldoorlog en in de dertiger jaore woorte beej geologische expedities get boete 't stedje groeëte tin- en uraniumreserves gevónde. Pevek greujde es gevolg daovan oet wies 't centrum van 'n mienbouwgebeed. De ligking aan zieë zörgde veur nog mier bedrievigheid, umdet me allein via de zieëhave zwaor matterjaal veur de mienindustrie kós aanveure. Vaerder goof 't heej ten tiede van de Sovjet-Unie ouk 'ne goelag.

Pevek haet saer 1967 stadsrechte.

Nao de val van 't communisme verdween de mienindustrie en veel de noordelike zieëroute eweg. Daodoor verlete vuuel luuj 't stedje en vertrokke zeej nao ander dele van Rösland, wao mier werk waas te vinde. Saer e paar jaor nump 't aantal inwoeëners weer 'n bietje toe.