Provincie

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

'n Provincie ies 'n besjtuurslaog van e land, die 'n eige regionaal regering haet. In Nederland ies de provincie de besjtuurlike einheid tösje gemeinte en riekseuverheid; in Belsj liek dees besjtuurslaog tösje de gemeinte en 't gewes. De geweste Vlaandere en Wallonië zint verdeild in provincies, 't Brussels Hoofsjtaejelik Gewes haet gein provincies. Ouch in ander sjtate weurt de term provincie gebruuk veur 'n bovelokaal besjtuurslaog; de verantwoordelikhede van zoa'n gebeed kènne èvvel nogal versjille van die in Nederland en Belsj. Nederland haet 12 provincies, Belsj haet d'rsj 10.

Aan 't hoof van 'n provincie sjteit de Commissaris van de Keuning (Nederland) of de gouvernäör (Belsj). De Commissaris van de Keuningin van Nederlands Limburg weurt dèks ouch gouvernäör geneump. In Nederland weurt 't provinciaal besjtuur gevörmp door de Provinciaal Sjtate, de Gedeputeerde Sjtate en de Commissaris van de Keuning(in); in Belsj zint diet respectievelik de provincieraod, de Besjtendige Deputatie en de gouvernäör.