Peetnónk

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Peetnónk, paetnónk, paeternónk of petere, in 't Nederlands peter, ies bie de Katholieke de duipvader van 'ne baby, dae geduip weurt. Hae deit same mèt de peettant of paat (of paettant) de duipbelofte, die inhèlt dat zie alle koad zölle aafwieze en troew aan 't Katholiek gelouf. Same mèt de peettant sjteit 'r names de kèrkgemeinsjap borg veur d'n duip en 't vormsel. Same zint ze de getuge bie d'n duip en sjpreke names de duipeling. Zie bekieke ouch of 't kind later volges de kèrkelike reigelsj laef. Ein van de duipname van 't kind krieg 't van de peetnónk. De naam ies aafgeleid van 't Latiense woord pater. 't Gebruuk van peetnónk es duipvader besjteit saer de 4e ièw. 'ne Peetnónk waor vreuger meistal eine echte nónk van de duipeling, meh 't kèn sjuus zoa good 'ne opa, broor of naef zin. Ouch weurt, veural in later jaore es de familie kleiner ies gewore, 'ne vrund gekoze.