Pearl Harbor (marinebasis)

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

---

Lochfoto van Pearl Harbor noe

Pearl Harbor (Nederlands: Parelhaven) is ein Amerikaanse marinebasis op Oahu, ein eilandj det biej de Hawaï-archipel heurtj, ongeveer 11 kilomaeter ten weste van Honolulu. Bekindj gewore is d'r door de aanval (kiek Aanval op Pearl Harbor) van'ne Japanse marine op'pe Amerikaanse marine. De Japanse regering haaj besjlaote det eine oorlog mit America onvermijdelik waas. Admiraal Isoroku Yamamoto werkdje ein geniaal plan oet om de Amerikaanse vloot die in Pearl Harbor loog oet te sjakele. Door deze aanval op 7 december 1941 waerdje de VS veur 't eers aktief betrokke in'ne Tweede Waereldoorlog. De marinebasis van Pearl Harbor is ein National Historic Landmark.

Gesjiedenis

USS Arizona Memorial

Satellietfoto van Pearl Harbor

Pearl Harbor in oktober 1941 (in 't midde Ford Island; links daovan de ligkplaatse van'ne sjlaagsjepe, de Battleship Row )

USS Arizona ontploftj in 1941

De Verenigde Sjtaote krege in 1887 't alleinrecht om de baai te gebroeke wo later de marinebasis Pearl Harbor zoew ontsjtaon te gebroeke. Mit de aanligk van'ne have waerdje in 1898 nao de Annexatie van Hawaii door de USA begos. In 1911 waerdje ein elf maeter deep kanaal klaorgemaaktj, zodet grote sjeepe doorgank hejje nao de oceaan. 't Havebekke haetj ein deepte van 18 maeter, daodoor kinne ouch grote sjlaagsjepe de have binneloupe.

Door de Japanse aanval waerdje dees have waereldjberoempdj. De lochaanval begos 's morges op 7 december 1941 en kosdje 2.403 Amerikane 't laeve. Ofsjoon de gevreesde Kamikaze door de Japaners strategisch pas vanaaf 1944 ingezatj waerdje, zeen d'r ouch in Pearl Harbor van dees aanvalle oetgeveurdj.

't Toen gezonke sjlaagsjeep USS Arizona (BB-39) waerdje, wie ouch de mit 't sjeep gezonke bemanning nooit geborge en ligktj vandaag nog es aandinke in'ne have. Euver 't wrak waerdje ein drievendje gedinkplaats verankerdj, die se mit ein beutje kins bezeuke. De aolie dae zelfs noe nog nao baove kumptj oet 't wrak waerdj de 'traone van'ne Arizona' genumpdj.

Op 21 mei 1944 gebeurdje d'r nog ein drama veur de Amerikaanse marine in Pearl Harbor, 't tank lanjingssjeep USS LST-353 (LST beiteikendj Landing Ship, Tank) explodeerdje veur de kade van West Loch (op West Loch waas de invasievloot veur de Pacifc gesjtationeerdj), terwiel ze bezig ware munitie in te laje. In heel korte tied ontplofdje d'r zes van die lanjingssjepe, en twee angere raakdje zjwaor besjadigdj, 163 matroze kwame om, en 396 raakdje gewondj. Dit waas veur de Amerikane 't op ein nao ergste incident tiedes de tweede waereldoorlog.

Vanaaf 1980 is in Pearl Harbor ouch 't Arizona Memorial te vinje, det biej eederein de gedachte aan'ne aanval op Pearl Harbor laevendig mot haaje. In 't museum zeen versjillendje orgineel sjtökke van'ne USS Arizona te vinje en ouch waere modelle van'ne Japanse vleegdeksjepe tentoongesjteldj. Verder is d'r ouch ein model te zeen van'ne op'pe baom ligkendje Arizona mit de daobaove geboewdje gedinkplaats. De gedinkplaats zelf is allein per boot bereikbaar, en is deil van eine vasgesjteldje bezichtigingstoer, in dae toer is ouch ein documentairefilm die ein half oer doertj opgenomme.

Vlak biej de Arizona Memorial ligktj sins 1998 't museumssjeep USS Missouri (BB-63), 't zöstersjeep van'ne USS Arizona, veur de kade. Op det sjlaagsjeep waerdje op 2 September 1945 in'ne Baai van Tokio de onveurwaardelikke capitulatie van Japan geteikendj.

Externe link

• Offisjeel site van'ne Amerikaanse marine

Bronne

De Duitse Wikipedia [1] haetj es bron gedeentj veur dit artikel.