Paul Cézanne

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Zelfportrèt (1880-1881)

Paul Cézanne (19 januari 1839 - 22 oktober 1906) waor 'ne Franse kunssjilder. Zien vreug werke zint erg perseunlik en roew; daonao sjilderde hae in de sjtiel van 't impressionisme en weer later óntwiekkelde hae ein eige sjtiel die veuroetleep op 't kubisme.

Leve

Cézanne woort gebore in Aix-en-Provence, woa hae ouch nao sjoal ging. Dao raakde hae bevrund mèt Émile Zola. Hae begoes mèt ein sjtudie rechte, meh heel dao, tege de zin van ziene pap, mèt op um sjilder te were. In 1862 ging hae same mèt Zola nao Paries. In Paries kaom hae in kontak mèt de impressioniste. In 1863 exposeerde hae op de Salon des Refusés in Paries, ein tentoansjtèlling mèt werke die neet tot de officieel Salon woorte toegelaote.

In 1869 lièrde hae Hortense Fiquet kènne, die ouch es sjildersmodel wèrkde. Mèt häör woonde hae in de tied van de Frans-Duutsje oorlog in 't dörpke l'Estaque bie Marseille. Hunne zoon Paul woort in 1872 gebore in Paries. In datzelfde jaor sjilderde hae same mèt Camille Pissarro in Auvers-sur-Oise. Hie lièrde hae ouch Vincent van Gogh kènne. Wie in 1874 de ièrsjte expositie van de impressioniste woort georganiseerd, zörgde Pissarro deveur dat dao ouch werk van Cézanne kaom te hange.

Montagne Sainte-Victoire (1888-1890)

Cézanne trouwde in 1886 mèt Hortense. Neet lang daonao sjtorf ziene pap en kreeg hae ein groate erfenis, woadoor hae financieel onafhenkelik woort. 't Jaor daonao deeg Cézanne mèt aan de expositie van Les XX in Brussel.

Vanaaf 1897 góng Cézanne weer permanent in Aix-en-Provence wone. Op de waereldtentoansjtèlling van 1900 in Paries woorte drie sjilderieje van häöm tentoangesjtèld. In deze tied sjilderde hae väöl geziechte op de Montagne Sainte-Victoire, ein gebergde vlak bie Aix. Op 22 oktober 1906 sjtorf Paul Cézanne in Aix.