Oeteldonk

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

Oeteldonk is de vastelaovesnaam van De Bosj (Nederlands: Den Bosch). D'r besjtaon versjillende verklaoringe väor deze naam. Dök waert gedachtj det de naam sjtamtj van 'oetel', waat Braobants (Meierijs) is väör kwekkert; e typisch boerewaord, waat in 't sjtadsdialek van De Bosj neet veurkömptj. De kwekkert is ei belangriek symbool van de vastelaovendj in De Bosj. Donk beteikentj "dreug plaatsj in 't moeras" en kömtj väöl väör in name van dörper in Oos-Braobantj.

'n Anger verhaol is, det de naam 'n waordsjpeling zow zeen: oetel zow verwieze nao Van den Oetelaar, 'n femilienaam dae väol väorkwaam in 't dörp Den Dungen. De 19e eeuwse biesjop Godschalk waas in det dörp gebaore. Deze biesjop bekritiseerde de vastlaovendj sjterk en wooj 't laote verbeie.

tradities

Knillis is 'ne pop van papier-maché dae de vaostelaovendj symboliseertj. Knilles hingtj tiedes de carneval baove de mert in Oeteldonk. Op vastelaovesdeensdig 's aoves om 12.00 oere waert Knilles begrave.

Hendrien is ei boerevruike det in sjrikkeljaore Knilles vergezèltj.

Boer Knillis en Hendrien

Prins Carneval hèt eder jaor Prins Amadeiro (anagram van 'omdraaie') en is traditioneel emes van baove de grote riviere, dae neet in De Bosj woontj en 'ne protestant mot zeen. De Prins besjloet zelf wienieë d'r abdiceert: 't kömtj dök väor, det 'ne prins meerder jaore achterein regeertj.

Versjil mit anger tradities

De vastelaovestradities in Oeteldonk versjille sjterk van de Limburgse tradities, en ouch van de tradities örges angers in Braobantj. Zo dreugtj bekans eederein 'n blauwe "boerenkiel", gein echt vastelaovespekske. De luuj zeen neet gesjmienktj. Vastelaovesleedjes zeen in 't Nederlands, aevel waal Nederlands mit ei dudelik Braobants accent. De belangrieke pesone van de 'Oeteldonkse club' drage gein vaere oppe kop en de groet 'alaaf' waertj neet gebroektj. Waal waertj 'ne optocht gehaoje.

De sjfeer tiedes de carneval is opvallendj 'aope': miense van boete De Bosj waere meistal neet d'rop aangegkeke es ze in De Bosj de vastelaovendj mitviere. Dees aopenheid nao miense van boete de sjtad waert ouch geaccentueerd door het feit det de prins van boete de sjtad kömptj.