Nothing (Arizona)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Verlaote Nothing in jannewarie 2011.

Nothing is 'n gemeintevrij nederzètting tege de oosgrens vaan Mohave County, in de Amerikaanse staot Arizona. Anno 2014 sjijne dao gein lui mie te woene. 't Ligk aon de Amerikaanse Route 93 vaan Phoenix nao Las Vegas, midde in de weustenij. Kortbijste dörper zien Bagdad en Wikieup, wat zoe'n daarteg kilometer nao 't noordweste ligk. In de wijen umtrèk vint me wieneg aanders es weuste.

Historie

Nothing woort gestiech in 1977, volgens de plaotseleke bevolking door 'e stèlke zaatlappe'. Dit zouw d'n oongewoene naom (ingels veur 'niks') mote verklaore. De ganse bevolking (begin jaore nul veer persoene) heel 'n benzinepoomp ope. Hei woorte ouch stein oet de umgeving es souvenirs verkoch. Achter de benzinepoomp laog 'ne kleine sjroethoup. Wijer gief of gaof 't in Nothing 'ne praotpaol. De aondach die de naom vaan 't pläötske trok, woort bewös versterk mèt 't plaotsnaombord, boe dit op te leze waor:

Town of Nothing Arizona. Founded 1977. Elevation 3269ft.

The staunch citizens of Nothing are full of Hope, Faith, and Believe in the work ethic. Thru-the-years-these dedicated people had faith in Nothing, hoped for Nothing, worked at Nothing, for Nothing.

Nothing, Arizona. Gestiech in 1977. Huugde 996 meter.

De köpsege börgers vaan Niks loupe euver vaan Hoop, Vertrouwe en Geluif in d'n arbeidsmoraol. Door de jaore heer höbbe dees touwgewijde lui in Niks geluif, op Niks gehoop, aon Niks en veur Niks gewèrk.

De situatie wie ze bove steit weurt door ouggetuige nog begin jaore '00 bevesteg. In mei 2005 evels bliek de benzinepoomp te zien touwgegaange. In augustus 2008 vertuint 't gebuiwke zelfs teikene vaan verval. Daonao leefde 't pläötske weer eve op wie eine Mike Jensen 't opkoch mèt de bedoeling hei pizza's te goon bakke en nog aander dinger veur passerende otomobiliste te verkoupe. In 2011 evels waor de zaak sjijns weer gestop: de vinstere waore touwgetimmerd. Nothing is de lèste jaore dus 'n spook'stad' gewore (in dees regio gein bezunderheid).

Bron

Dit artikel is gebaseerd op 't corresponderend Ingelstaoleg artikel, en wel in dees versie; zuug dao veur historie, bronne en oteurs.