Niger (reveer)
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De Niger is de wichtigste reveer van Wès-Afrika mit 'n lingdje van óngevieër 4160 kilomaeter. De reveer löp in 'n half-maonvorm door Guinee, Mali, Niger, Benin en Nigerië. De reveer móndj oet via 'ne groeaten delta inne Golf van Guinee. De Niger is de op twieë nao langste reveer in Afrika. Allein de Niel enne Kongo zeen langer.
Loup vanne reveer
bewirkDe Niger haet 'nen hieël óngebroekelike loup, namelik inne vorm van 'n half maon. Deze loup heel Europese geografe mieër es twieë millennia bezig. De reveer óntspringk óngevieër 250 kilomaeter t'n oeaste vannen Atlantischen Oceaan inne Guinee, meh löp in plaats van wèswers in naordoeastelike richting vanne kös aaf de Sahara in. De reveer maak den 'ne baog door Mali, drejtj vervolges sjerp nao rechs en móndj in Nigerië inne Golf van Guinee oet.
De vraemdje loup is wersjienlik toet standj gekómme doordet de Niger besteitj oet twieë ajer revere die zeen samegeveug gewaore. De Baove-Niger vanne brón langs de hanjelsstad Timboektoe toet ane bóch inne reveer móndje oeatj oet in e noe neet mieë bestäöndj maer. d'n Ónger-Niger begós inne häöele kórtbie det maer en struimdje nao 't zuje nao de Golf van Guinee. Doe de Sahara tösse 4000 en 1000 v.Chr. opdruuegdje verangerdje de twieë revere häöre koers en raakdje mitein verbónje. Dees theorie wuuertj algemein geaccepteerdj, meh door sómmige geografe betwösj.