Nicolae Ceaușescu

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Nicolae Ceaușescu.

Nicolae Ceaușescu (Scornicești, 26 jannewarie 1918 - Târgoviște, 25 dieëtsember 1989) waas 'ne Romeense communistische politieker. Van 1965 toet 1989 waas hae de sikkertaer-zjinneraal vanne Romeense Communistische Partie, waat 'm d'n twieëdjen en daomit ouch de lèste communistische leider van Romenië maakdje. Vanaaf 1967 waas hae 't staotshöd van 't landj, prizzendèntj vanne Staotsraod en vanaaf 1974 ouch de prizzendèntj van 't Rippebliek, toetdet 't inne Romeense Rivveluusje in dieëtsember van 1989 óm woort gesmete bieje val van 't communisme in Oeas-Europa.

Inne ieëste hèlf van zien hieërsjap euver Romenië haw d'r e kinmirkendje aop beleid richting Wès-Europa enne Vereinigdje Staote, womit t'r aafweek vanne anger lenjer oet 't Warsjaupak inne Kaje Krieg. Dezen trand heel d'r aan van ziene veurgenger, Gheorghe Gheorghiu-Dej, dae ouch d'rveur haw gezörg det de Sovjet-Unie zien legers trögktróch oet Romenië in 1958.

't Twieëdje deil van zien hieërsjap waas väöl brutaler en óngerdrökkendjer es 't ieëste. Kinmirkendj waas persoeansverhieërliking van 'm, nationalisme enne verslechtering vanne boetelandjse benj mit 't wèste, mer ouch mitte Sovjet-Unie. Inne Romeense Rivveluusje woort 't rezjiem ómgesmete. Naodet Ceaușescu waas gevange kreeg t'r e twieë oer doerendje sjawpercès in e klaslokaal wobie hae en zie vrouwmis toetten doead woorte veroeardeildj. Nao de oetspraok woorte de twieë handjboejjen ómgedaon en nao boete genómme veur dao oppe plaats te waeren executeerd. De biljer van dees execuusje woorte kort daorop oetgezónjen oppe nasjenalen tillevies.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Nicolae_Ceaușescu&oldid=460864"