Mummie
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
'ne Mummie is 't liefelik restant van emes wobie 't óntbinjingsprocès ('t rotte) nao 't sterve bao gans toet stilstandj is gekómme. Hiedoor blief neet allein 't gerieëps bewaard van 't lief, mer ouch de zaachte deil, wie de hoed. 'ne Mummie kan óntstaon door kónzerverendje bewirkingen of door netuurlike ómstenjigheje. Väöl culture dieëje de gestórvene mummificere.
De bekindjste vorm van mummificering is door oetdruueging, wie in weusdjes of hoeagberg, mer ouch bieje veenlieke die in nate, zoer ómstenjigheje óntstaon kaltj m'n euver mummificatie. De term wuuert aevel neet gebroek veur lieve die bewaard zeen mit moderner technieke, wie plastinatie of cryonisme. Ouch bieëster die taxidermisch prepareerd zeen (opgezatj zeen) waere neet betrach mummies te zeen.
Mummies zeen veural bekindj oet 't Aad Egypte van róndj 3000 v.Chr. In 't Aad Egypte mèndje me det m'n 't lief enne persuuenlike bezittinge mit kós nummen in 't laeve nao d'n doead. Mer ouch väöl anger druueg gebiede kinne graver worin me knap vergange, oetgedruuegdje lieven en graafgifte vónjen haet die bewaard zeen door e netuurlik mummificatieprocès. Zoea kintj m'n ouch mummies oet Midden- en Zuud-Amerika, Greunlandj, Sinkiang, Mongolië en Europa. Oet Siberië kintj me nag de iesmummies.