Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Mestreechs, es te dit dialek sjpriks.

De Meule van Lombok is gelaege aan de revier de Jeker ten zuuje van Mesjtreech in 't buurtsjap Biesland van de vreugere gemeinte Oud-Vroenhove. De meule is n middesjlaagmeule en ligk op de lènkeroever van de revier en besjtóng vreuger oet tweë meulegeboewe. De veursjte meule waas tot 1850 in gebruuk es graanmeule, de achtersjte waas 'n aoliemeule. Allein van de veursjte is de geetiezere maalsjtool mèt dao-op 't iezere meuleraad oet 1937 nog aanwezig. Daoróm wirt allewiel allein dit geboew aangeduud es de Meule van Lombok. 't Meuleraad haet 'ne middellien van 4,96 maeter en 'n breite van 0,88 maeter. De meulegeboewe zint oet mergelsjtein opgetrokke, deils veurzeen van zoagenaamde sjpeklaoge van natuursjtein aafgewisseld mèt 'ne bandj van mergel.

De Meule van Lombok biej Mesjtreech (lènks) en de vreugere Aoliemeule (rechs) wovan de öpening veur de as van 't waterraad nog zichbaar is.

GesjiedenisBewirk

Oarsjprónkelik dateert de meule oet ómsjtreeks 1500. In de Franse Tied was 't ’n graanmeule mèt tweë koppele sjtein en 'n houte waterraad en waas in eigedóm van Willem Gilessen. De meule waas vervolges aafwisselend in gebruuk es houtzaegerie en wolsjpènnerie. In 1850 woorte allebei de meules op de lènker oever aangekoch door de Mesjtreechse waopehanjelaer Petrus Stevens dae dao zien wirkplaatsj veur 't make van gewaerloupe van maakde. Dertig jaor later kaom de wirkplaatsj in 't bezit van Eduard Beaumont, 'ne angere waopefabrikant oet Mesjtreech, dae 'n florerende gewaermakerie aan 't Christussjträötje in 't Boschstraotkerteer bezaot.

De meule bleef pès ómsjtreeks 1960 es waterkaoremeule in bedrief, daonao waas ’t neet meë loanend óm graan mèt sjtein te male en de meule veel definitief sjtil. De hujige eigenaere zint de erve van de lètste meulenaer.

Zuug ouchBewirk

Brón, externe linksBewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Meule_van_Lombok&oldid=349573"